मुंबई, दि. ३० (पीसीबी) : मराठीमधील ज्येष्ठ अभिनेते दिवंगत निळू फुले यांची लेक, अभिनेत्री गार्गी फुले ही देखील अभिनयात सक्रीय आहे. अभिनयाबरोबरच गार्गी आता राजकारणात सक्रीय झाल्या आहेत. गार्गी यांनी राष्ट्रवादी कॉंग्रेसमध्ये प्रवेश केला आहे.
गार्गी यांच्या पक्ष प्रवेशावेळी प्रदेशाध्यक्ष जयंत पाटील, विधानसभेचे विरोधी पक्ष नेते अजित पवार उपस्थितीत होते. राष्ट्रवादी कॉंग्रेसमध्ये प्रवेश केल्यानंतर गार्गी फुले म्हणाल्या,’खूप दिवसांपासून अजित पवार यांच्यासोबत काम करण्याची इच्छा होती. मला विचारणा झाल्यानंतर लगेचच मी हो म्हटलं. राष्ट्रवादी पक्षाची जी विचारसरणी आणि विचार आहेत. त्याच विचारसरणीचे माझे बाबा निळू फुले होते. त्यामुळे माझ्या वडिलांचे जे विचार होते. त्या विचारांना राष्ट्रवादी कॉंग्रेस न्याय देईल…’
गार्गी फुले पुढे म्हणाल्या की,’ राष्ट्रवादीसोबत काम करण्याचा मला आनंद आहे. शरद पवार, सुप्रिया सुळे, अजित पवार यांच्यासोबत वडिलांचे चांगले संबंध आहेत. आता पक्षासाठी काहीतरी करण्याची इच्छा आहे. त्यामुळे मी राष्ट्रवादी काँग्रेस मध्ये येऊन प्रवाहात येईल. आता नुसतं किनाऱ्यावर बसून पाहायचं नाही आहे. मुख्य प्रवाहात येऊन काम करायचं मी ठरवलं आहे. तरुणांना वाटतं राजकारणात यावं आणि बदल व्हावा त्यानुसार माझा सुद्धा प्रयत्न असेल.
गार्गी फुले यांनी स्त्रीमुक्ती या विषयात पदवी घेतली आहे. अभिनयाचं बाळकडू त्यांना त्यांच्या वडिलांकडूनच मिळालं आहे. १९९८ साली प्रायोगिक नाटकाच्या माध्यमातून त्या मनोरंजनसृष्टीशी जोडल्या गेल्या. सत्यदेव दुबे यांच्याकडे त्यांनी अभिनयाचं शिक्षण घेतलं. समन्वय या नाट्यसंस्थेच्या अनेक प्रायोगिक नाटकात गार्गी फुले यांनी काम केलं आहे.
गार्गी फुले यांनी मराठी मालिका, सिनेमे, नाटक आणि वेबसीरिजमध्ये काम केलं आहे. मळभ, कोवळी उन्हे, श्रीमंत, वासंती जीर्णनी, सुदामा के चावल, सोनाटा या नाटकांमध्ये गार्गी फुले यांनी काम केलं आहे. तर राजा राणी ची गं जोडी, सुंदरा मनामध्ये भरली, तुला पाहते रे, कट्टी बट्टी या लोकप्रिय मालिकांमध्ये गार्गी फुले यांनी काम केलं आहे. तसेच भाडीपा चिकटगुंडे, राते या वेबसीरिजमध्येही त्या झळकल्या आहेत. आता राजकारणात त्या कशा काम करणार याकडे सर्वांचं लक्ष लागलं आहे.
