पिंपरी,दि.०९(पीसीबी) – संत तुकाराम नगर येथील डॉ.बाबासाहेब आंबेडकर क्रीडा संकुल येथे क्रीडा सुविधा व उपकरणे उपलब्ध करुन देताना अनुभवी सल्लागाराची नेमणूक करावी अशी मागणी माजी महापौर तथा विरोधी पक्षनेते योगेश बहल यांनी पिंपरी चिंचवड महानगरपालिकेचे आयुक्त श्रावण हार्डीकर यांच्याकडे केली आहे.
संत तुकाराम नगर येथील डॉ.बाबासाहेब आंबेडकर क्रीडा संकुल येथील जुने स्टेडियम व मैदान जीर्ण अवस्थेत आहे आणि नूतनीकरणाची गरज आहे. नूतनीकरणाबरोबरच आज इच्छुक खेळाडू आणि तरुण रहिवाशांच्या गरजा भागविण्यासाठी अतिरिक्त पायाभूत सुविधा आवश्यक आहेत असंही योगेश बहल यांनी म्हटलं आहे.
स्टेडियमच्या मैदानात कित्येक वर्षांपासून क्रीडा व सामाजिक कार्यक्रमांसाठी क्रीडा सुविधा म्हणून काम केले जात आहे, परंतु पीसीएमसीमध्ये इतरत्र राबविण्यात येणाऱ्या आधुनिक क्रीडा सुविधा लक्षात घेऊन या सुविधेत क्रीडा व करमणुकीसाठी अतिरिक्त पायाभूत सुविधा आवश्यक आहेत.
म्हणून डॉ.बाबासाहेब आंबेडकर क्रीडा संकुल येथे उपलब्ध असणाऱ्या क्रीडा सुविधा व उपकरणे उपलब्ध करुन देताना अनुभवी सल्लागाराची नेमणूक करावी. आपण या प्रकरणात सर्वोच्च प्राधान्याने लक्ष देण्याची विनंती करा आणि पुनर्विकासाच्या प्रस्तावाचा शक्य तितक्या लवकर विचार करावा अशी मागणी बहल यांनी केली आहे.
