पुणे, दि. ३० (पीसीबी) – भीमा कोरेगाव येथे गेल्या वर्षी झालेल्या हिंसाचाराचे पडसाद संपूर्ण राज्यात उमटले होते. त्या पार्श्वभूमीवर यंदा कोणताही अनुचित प्रकार होऊ नये, यासाठी पोलिस प्रशासनाने कडेकोट तयारी केली आहे. यंदा एक जानेवारीला गेल्या वर्षीपेक्षा दहा पट अधिक पोलिस बंदोबस्त तैनात करण्यात येणार आहे. त्यामध्ये पाच हजार ग्रामीण पोलिस कर्मचारी, राज्य राखीव पोलिस दलाच्या १२ तुकड्या, बाराशे होमगार्ड आणि दोन हजार स्वयंसेवकांचा समावेश आहे. या शिवाय ११ ड्रोन कॅमेरे, पाचशे सीसीटीव्ही कॅमेरे, शंभर व्हिडीओ कॅमेऱ्यांद्वारेही परिसरात लक्ष ठेवले जाणार आहे.
कोरेगाव भीमा विजयस्तंभ अभिवादन दिनानिमित्त केलेल्या नियोजनाची माहिती पोलिस आणि जिल्हा प्रशासनाने शनिवारी पत्रकार परिषदेत दिली. या वेळी कोल्हापूर परिक्षेत्राचे विशेष पोलिस महानिरीक्षक विश्वास नांगरे पाटील, जिल्हाधिकारी नवल किशोर राम, पुणे ग्रामीण पोलिस अधीक्षक संदीप पाटील उपस्थित होते.
गेल्या वर्षी झालेल्या अनुचित घटनेमुळे या परिसरातील सामाजिक वीण विस्कळीत झाली होती. मात्र, यंदा जिल्हाधिकारी आणि ग्रामीण पोलिस अधीक्षकांनी दोन महिन्यांपासून स्थानिकांशी संवाद साधत, गावागावांमध्ये बैठका घेत पुन्हा सलोख्याचे वातावरण तयार केले आहे. नागरिकांनी सामाजिक सौहार्द कायम ठेवावा, जातीय विद्वेष पसरवू नये, असे आवाहनही त्यांनी केले, तर ग्रामस्थांमध्ये कोणतेही मतभेद नसून यंदा कोणताही अनुचित प्रकार घडणार नाही, असा विश्वास जिल्हाधिकारी राम यांनी व्यक्त केला. या परिसरात सात ते दहा लाख लोकांची व्यवस्था होईल, पाणी, जेवणाची अडचण होणार नाही, असे नियोजन केल्याचेही त्यांनी सांगितले.
