पिंपरी-चिंचवड शहरातील बीआरटी मार्गिका सार्वजनिक बससेवा जलद आणि सुरळीत ठेवण्यासाठी राखीव करण्यात आली आहे. मात्र अनेक ठिकाणी खासगी चारचाकी आणि दुचाकी वाहनांचा या मार्गिकेत वाढता प्रवेश दिसून येत असल्याने PMPML बसचालकांना अडचणींचा सामना करावा लागत आहे.
बीआरटी बसस्थानकांच्या परिसरात खासगी वाहनांची वर्दळ वाढल्याने बसना स्थानकात प्रवेश करताना आणि बाहेर पडताना मार्ग काढावा लागत आहे. काही ठिकाणी तर बसचालकांना स्थानकाजवळच वाहतूक कोंडीत अडकावे लागत असल्याचे चित्र दिसत आहे.
खासगी वाहनचालक काही वेळासाठी वाहन थांबवणे, रस्त्याच्या कडेला वाहन उभे करणे किंवा बीआरटी मार्गाचा शॉर्टकट म्हणून वापर करणे अशा प्रकारांमुळे परिस्थिती अधिक गंभीर होत आहे. परिणामी बससेवेच्या वेळापत्रकावर परिणाम होण्याची शक्यता निर्माण होत आहे.
वाहतूक पोलिसांकडून अधूनमधून कारवाई केली जात असली, तरी काही वेळानंतर पुन्हा त्याच ठिकाणी खासगी वाहनांची गर्दी दिसून येत असल्याची नागरिकांची तक्रार आहे. त्यामुळे बीआरटी मार्गावर नियमित गस्त, सीसीटीव्हीद्वारे देखरेख आणि नियम मोडणाऱ्या वाहनचालकांवर सातत्याने कारवाई करण्याची मागणी होत आहे.
