पिंपरी-चिंचवडमध्ये शिक्षण किंवा नोकरीसाठी बाहेरून येणाऱ्या तरुणांसमोर राहण्याची सोय हा मोठा प्रश्न असतो. त्यामुळे पीजी, को-लिव्हिंग आणि खासगी वसतिगृहांना मागणी वाढत आहे. आकुर्डी रेल्वे परिसर, वाल्हेकरवाडी, चिंचवड, निगडी प्राधिकरण, यमुनानगर, संत तुकारामनगर, वल्लभनगर, नेहरूनगर, मासुळकर कॉलनी, अजमेरा, सांगवी, नवी सांगवी, पिंपळे गुरव, पिंपळे निलख आणि हिंजवडी परिसरात अशा निवास पर्यायांची उपलब्धता वाढताना दिसते.
पीजी किंवा को-लिव्हिंगमध्ये राहण्यासाठी साधारण ₹१२,००० ते ₹१५,००० प्रतिमहिना खर्च येऊ शकतो. काही ठिकाणी जेवण, वाय-फाय, गरम पाणी, बेड, कपाट, स्वच्छतागृह आणि इतर सुविधा एकाच ठिकाणी दिल्या जातात. को-लिव्हिंगचा खर्च उपलब्ध सुविधा आणि लोकेशननुसार बदलतो.
विद्यार्थी किंवा नोकरीच्या शोधातील तरुणांनी जागा निश्चित करण्यापूर्वी भाडे, अनामत रक्कम, उपलब्ध सुविधा, जेवणाचा खर्च आणि कराराच्या अटी स्पष्टपणे तपासाव्यात. शक्यतो लेखी करार करूनच व्यवहार करावा आणि ऑनलाइन व्यवहाराची नोंद जतन करावी.
मुलींसाठी सुरक्षिततेच्या दृष्टीने सीसीटीव्ही, बायोमेट्रिक प्रवेश आणि सुरक्षा रक्षक असलेले पीजी अधिक पसंत केले जातात. काही पालकही अशा ठिकाणांना प्राधान्य देतात.
मागणी वाढल्याने काही ठिकाणी जास्त भाडे किंवा अनामत रक्कम आकारली जात असल्याच्या तक्रारीही आहेत. म्हणून जागा निवडताना सुविधा, सुरक्षितता आणि खर्च यांची तुलना करून निर्णय घेणे महत्त्वाचे ठरते.
साधारण भाडे:
पीजी — ₹१२,००० ते ₹१५,००० प्रतिमहिना
सामायिक सदनिका — ₹१५,००० ते ₹२०,००० पर्यंत; साधारण ७-८ जण राहू शकतात
स्वतंत्र खोली/सदनिका — भाड्यासोबत वीज, पाणी आणि इतर खर्च वेगळे लागू शकतात.
