राजस्थान, दि. १४ (पीसीबी) – स्वत:च्या १४ वर्षांच्या अल्पवयीन मुलीवर बलात्कार करणाऱ्या नराधम बापाने अटकेच्या भीतीपोटी आत्महत्या केल्याची घटना समोर आली आहे. ही घटना राजस्थानमध्ये घडली.
पीडित मुलीने आईला घडलेला प्रकार सांगितला होता आणि यानंतर महिलेने पतीविरोधात पोलीस ठाण्यात तक्रार दिली होती.
मिळालेल्या माहितीनुसार, राजस्थानमधील धारियावाडमधील सिहाद गावात राहणाऱ्या १४ वर्षांच्या मुलीवर तिच्याच वडिलांनी बलात्कार केल्याची घटना गेल्या आठवड्यात घडली होती. नराधम पित्याने मद्यधूंद अवस्थेत असताना हे कृत्य केले होते. त्याने पीडित मुलीला जंगलात नेले आणि तिच्यावर बलात्कार केला. त्याने मुलीला चाकूचा धाक दाखवत ठार मारण्याची धमकी देखील दिली. पीडितेने घरी परतल्यावर घडलेला प्रकार आईला सांगितला. महिलेने पतीला याचा जाब विचारताच त्याने पत्नीलाही धमकी दिली.
त्याने पत्नीला आणि मुलीला घरात डांबून ठेवले. अखेर महिलेने संधी मिळताच घरातून पळ काढला आणि भावाचे घर गाठले. भावाच्या मदतीने तिने पोलिसांकडे तक्रार दाखल केली. पोलिसांनी गुन्हा दाखल करत तपासाला सुरुवात केली. पत्नीने पोलिसांकडे तक्रार दाखल केल्याचे नराधमाला समजले होते. त्याने घरातून पळ काढला होता. सोमवारी सकाळी तो घरी परतला. भावाने त्याला घरी परतताना पाहिले होते. त्याने तातडीने पोलिसांना हा प्रकार सांगितला. पोलिसांचे पथक घटनास्थळी पोहोचली असता नराधमाने गळफास घेऊन आत्महत्या केली.
