दि . ८ ( पीसीबी ) – वाकड-ताथवडे परिसरातील नागरिकांनी हवा प्रदूषणाविरोधात भव्य मूक मोर्चा काढला होता. शनी मंदिर रोड वाकड-ताथवडे परिसरातील २२ हून अधिक गृहनिर्माण सोसायट्यांचे ५०० पेक्षा जास्त रहिवासी आज “*हवा प्रदूषण विरोधी मूक मोर्चात सहभागी झाले होते. सिमेंट मिक्स धुळ आणि बांधकामाच्या धुळीमुळे वाढलेल्या प्रदूषणाच्या विरोधात आवाज उठवत स्वच्छ व निरोगी पर्यावरणाची मागणी करण्यात आली.
वाकड-ताथवडे हौसिंग सोसायटीज फोरम यांच्या नेतृत्वाखाली हा मोर्चा कोहिनूर कोर्टयार्ड वन सोसायटी पासून इंदिरा स्कूल मार्गे वाकडकर चौकापर्यंत नेण्यात आला. या मोर्चात ज्येष्ठ नागरिक, महिला आणि लहान मुले मोठ्या संख्येने सहभागी झाले होते.
नागरिकांनी मांडलेले मुख्य मुद्दे:
- हवा प्रदूषणाचा वाढता स्तर: सिमेंट मिक्स धूळ आणि रस्त्यावरील अवजड वाहनांमुळे होणारे प्रदूषण यामुळे परिसरातील हवेची गुणवत्ता अत्यंत खालावली असून श्वसनाचे आजार वाढत आहेत.
- आरोग्यावर गंभीर परिणाम: परिसरातील लहान मुले, वृद्ध आणि गरोदर महिलांमध्ये दम्याचे, अॅलर्जीचे आणि श्वसनासंबंधी आजारांचे प्रमाण वाढत आहे.
- प्रशासनाकडून दुर्लक्ष: पिंपरी-चिंचवड महानगरपालिका (PCMC), महाराष्ट्र प्रदूषण नियंत्रण मंडळ (MPCB), PMRDA आणि स्थानिक लोकप्रतिनिधींकडे अनेक वेळा तक्रारी करूनही कोणतीही ठोस कारवाई झालेली नाही.
- नैसर्गिक जीवनमानावर परिणाम: सिमेंटच्या धुळीचा थर रस्त्यांवर, गाड्यांवर आणि घरांवर साचत असून नागरिकांचे जीवनमान ढासळत आहे.
नागरिकांच्या प्रमुख मागण्या:
- सिमेंट मिक्स धूळ त्वरित बंद व्हावी.
- वाढत्या प्रदूषणावर नियंत्रण ठेवण्यासाठी कडक नियम आणि उपाययोजना लागू कराव्यात.
- वायू प्रदूषण पातळीची नियमित तपासणी करून अहवाल सार्वजनिक करावा.
- रस्त्यांची नियमित २ वेळा साफसफाई करून धुळीचे प्रमाण कमी करावे.
- नियमांचे उल्लंघन करणाऱ्या वाहनावर कठोर कारवाई केली जावी.
- रस्त्यांवरील धूळ कमी करण्यासाठी टँकरद्वारे, एअर गन द्वारे नियमितपणे पाण्याचा फवारा मारला जावा.
- प्रदूषणामुळे नागरिकांच्या आरोग्यावर होणाऱ्या परिणामांचा अभ्यास करून आवश्यक ती आरोग्यसेवा पुरवावी.
- रस्त्यांवरील झाडांची देखभाल आणि पाणी नियमित करावे.
प्रशासनाला इशारा-
नागरिकांनी प्रशासनाला स्पष्ट शब्दांत सांगितले आहे की, जर तातडीने उपाययोजना केल्या नाहीत, तर हा आंदोलन पुढील स्तरावर नेला जाईल.
वाकड-ताथवडे हौसिंग सोसायटीज फोरमचा संकल्प
या आंदोलनाच्या माध्यमातून नागरिकांनी स्वच्छ आणि निरोगी पर्यावरणासाठी लढा सुरूच ठेवण्याचा निर्धार व्यक्त केला आहे.
