पिंपरी, दि.१३ (पीसीबी) – पिंपरी शहर राष्ट्रवादीला पुन्हा एकदा खिंडार पडले आहे. माजी शहराध्यक्ष वसंत लोंढे, माजी उपमहापौर शरद बोऱ्हाडे यांच्यासह भोसरी मतदारसंघातील अनेक पदाधिकाऱ्यांनी मुख्यमंत्री देवेंद्र फडणवीस यांच्या उपस्थितीत भाजपमध्ये प्रवेश केला आहे, तर राष्ट्रवादीचे माजी नगरसेवक नारायण बहिरवाडे यांनी शिवसेनेचे पक्षप्रमुख उद्धव ठाकरे यांच्या उपस्थितीत शिवसेनेत प्रवेश केला.
रहाटणी येथे मुख्यमंत्री देवेंद्र फडणवीस यांची सभा झाली. त्यावेळी लोंढे, बोऱ्हाडे यांच्यासह माजी नगरसेवक घनश्याम खेडकर, आशा सुपे, प्रदीप तापकीर, सुनील लोखंडे, नीलेश नेवाळे, संजय पठारे आदी प्रमुख पदाधिकाऱ्यांनी भाजपमध्ये प्रवेश केला आहे. राष्ट्रवादीने आपल्याला पद देण्यापासून कायम वंचित ठेवले, आपला केवळ वापर करून घेण्यात आला, असा आरोप वसंत लोंढे यांनी केला. आमदार महेश लांडगे यांच्यासोबत जाण्याचा निर्णय घेत त्यांना पाठिंबा देत असल्याचे लोंढे यांनी सांगितले, तर खासदार श्रीरंग बारणे यांचे निकटवर्तीय नारायण बहिरवाडे यांनी आता शिवसेनेत प्रवेश केला आहे.
