अहमदनगर, दि. १७ (पीसीबी) – ज्येष्ठ नेते बाळासाहेब विखे यांच्यावर उपचार करण्यात विरोधीपक्ष नेते राधाकृष्ण विखे, शालिनी विखे व डॉ. सुजय विखे यांनी हेळसांड केली. पाच डॉक्टरांचा सल्ला डावलून सुजय यांनी आजारी बाळासाहेबांना लोणीला परत आणले. स्वत: हेलिकॉप्टरमधून फिरत असताना वडिलांना रुग्णवाहिकेतून आणले, असा खळब‌ळजनक आरोप विखे यांचे ज्येष्ठ बंधू डॉ. अशोक विखे यांनी केला. वडिलांचा अंत्यविधी करण्याचा आपला अधिकारही धाकटे बंधू विखेंनी हिरावून घेतल्याचे ते म्हणाले.
राष्ट्रवादीचे ज्येष्ठ नेते शरद पवार यांनी नगरचे राष्ट्रवादीचे उमेदवार संग्राम जगताप यांच्यासाठी प्रचार सभा घेतली. त्यामध्ये डॉ. अशोक विखे यांचे भाषण झाले. वडिलांचे आजारपण, अंत्यविधी, डॉ. विखे यांची वैद्यकीय पदवी अशा अनेक गोष्टींसंबंधी त्यांनी अनेक अरोप केले.
ते म्हणाले, “बाळासाहेब विखे आजारी असताना त्यांच्यावर उपचार सुरू होते. त्यावेळी डॉ. सुजय यांनी पाच डॉक्टरांनी दिलेला सल्ला डावलून त्यांना तशा अवस्थेत लोणीत आणण्याचा निर्णय घेतला. या तिघांसाठी जवळ जायचे असले तरी हेलिकॉप्टर वापरतात. मात्र, बाळासाहेबांना त्रास देण्याच्या उद्देशाने रुग्णवाहिकेतून आणले. मोठा भाऊ म्हणून वडिलांवर अंत्यसंस्कार करण्याचा आपला अधिकार होता. मात्र राधाकृष्ण यांनी तो हिरावून घेतला. यासाठी गावातील ब्राम्हण तयार नव्हते म्हणून पुणतांब्याहून आणले. वडिलांच्या मृत्यूनंतर माझ्या ताब्यातील संस्था काढून घेतल्या. त्यासाठी कोर्टात वडिलांच्या सह्या खोट्या असल्याचे त्यांनी सांगितले होते.
डॉ. सुजय यांच्या शिक्षणाबद्दल त्यांनी संशय व्यक्त केला. सुजय यांची पदवी खासगी विद्यापीठातील आहे. खासगी विद्यापीठाचा दर्जा आपल्याला माहिती आहेच. शिवाय त्यांचे काही शिक्षण लोणीत झाले तेव्हा परीक्षा कशा दिल्या, याचीही आपल्याला माहिती आहे. त्यामुळे ते कितीही हुशार असल्याचा दावा करीत असले तरी खरी परिस्थिती आपल्याला माहिती असून त्यांनी आजतागायत काहीही कमावलेले नाही.
बाळासाहेब विखे आणि पवार यांचे वैर नव्हते. त्याचा सध्याच्या राजकारणासाठी गवगवा केला जात आहे. प्र‌वरा परिसरात या विखे कुटुंबियांची हिटलरशाही चालते. त्यांच्या शिफारशीशिवाय कोणतेही काम होत नाही. त्यांनी सख्या भावाला एवढा त्रास दिला आहे, तर इतरांची काय व्यथा, असेही डॉ. अशोक विखे म्हणाले.”
