मुंबई, दि. ३० (पीसीबी) – काँग्रेसचे हर्षवर्धन सकपाळ व अपक्ष आमदार बच्चू कडू यांनी उमेदवारी अर्ज मागे घेतल्यामुळं विधानसभेच्या उपाध्यक्षपदी शिवसेनेचे आमदार विजय औटी यांची बिनविरोध निवड झाली आहे. या निवडीमुळं तब्बल चार वर्षांनंतर विधानसभेला उपाध्यक्ष मिळाले आहेत.
विधानसभेच्या अध्यक्षपदी सध्या भाजपचे हरिभाई बागडे आहेत. मात्र, विधानसभा उपाध्यक्षपद रिक्त होते. या पदासाठी विधानसभा अध्यक्षांनी बुधवारी निवडणूक जाहीर केली होती. त्यानंतर शिवसेनेकडून विजय औटी, काँग्रेसकडून हर्षवर्धन सकपाळ व अपक्ष आमदार बच्चू कडू यांनी अर्ज दाखल केले होते. संख्याबळ पाहता औटी यांची निवड निश्चित होती. मात्र, प्रतिस्पर्धी उमेदवारांनी अर्ज मागे घेतल्यामुळं औटी यांची बिनविरोध निवड झाली. विधानसभा अध्यक्ष हरिभाऊ बागडे यांनी तशी घोषणा केली.
विजय औटी हे नगर जिल्ह्यातील पारनेर विधानसभा मतदारसंघातून शिवसेनेतर्फे सलग तिसऱ्यांदा निवडून आले आहेत. त्यांचे वडील भास्करराव औटी याच मतदारसंघात दोनवेळा आमदार होते. कला शाखेचे पदवीधर असलेल्या औटी यांना घरातूनच राजकारणाचे बाळकडू मिळाले. १९८५ मध्ये त्यांनी प्रथम काँग्रेसकडून निवडणूक लढविली होती. त्यात त्यांचा पराभव झाला. त्यानंतरही ते राजकारणात सक्रिय राहिले. तालुक्यात सेनापती बापट पतसंस्थेची स्थापना केली. जिल्हा परिषदेच्या राजकारणातही ते आणि त्यांच्या पत्नी सक्रिय राहिल्या. २००४मध्ये औटी यांनी शिवसेनेकडून उमेदवारी मिळविली आणि निवडणूक जिंकली. त्यानंतर सलग तीन निवडणुका त्यांनी जिंकल्या. तालुक्यात संपर्क वाढविला.
शिवसेनेतील अभ्यासू लोकप्रतिनिधींमध्ये त्यांचा समावेश होतो. अखेर त्यांना उपाध्यपद मिळालेच. मधल्या काळात पारनेर विधानसभा मतदारसंघात त्यांच्यापुढे नवीन आव्हान उभे राहिले आहे. शिवसेनेतून बाहेर पडलेल्या निलेश लंके यांनी त्यांच्यासमोर राजकीय आव्हान उभे केले आहे. मात्र, विधानसभेचे उपाध्यक्षपद मिळाल्याने त्यांचे मतदारसंघातील वजन वाढणार आहे.
