शाहजहांपूर, दि. २० (पीसीबी) – स्वत:च्या मालकीच्या लॉ कॉलेजातील विद्यार्थिनीवर बलात्कार केल्याचा आरोप असलेले माजी केंद्रीय मंत्री व भाजप नेते स्वामी चिन्मयानंद यांना अटक करण्यात आली आहे. शहाजहांपूर येथील आश्रमातून विशेष तपास पथकाने (एसआयटी) आज सकाळी चिन्मयानंद यांना ताब्यात घेतले.
शहाजहांपूर येथे चिन्मयानंद यांचे लॉ कॉलेज आहे. याच कॉलेजातील एका विद्यार्थिनीवर बलात्कार केल्याचा व तिचे लैंगिक शोषण केल्याचा आरोप चिन्मयानंद यांच्यावर आहे. हा आरोप झाल्यानंतर उत्तर प्रदेशात मोठा राजकीय गदारोळ झाला होता. चिन्मयानंद निर्दोष असल्याचे सांगत त्यांचे पाठीराखे रस्त्यावर उतरले होते. मात्र, पीडित विद्यार्थिनीनेही माघार न घेता या संदर्भातले अनेक व्हिडिओ जाहीर केले होते. त्यानंतर चिन्मयानंद यांना अटक करण्याच्या मागणीने जोर धरला होता. चिन्मयानंद यांना अटक न झाल्यास आत्महत्या करण्याची धमकी पीडित मुलीनं दिली होती. हे प्रकरण चिघळणार असे दिसताच चक्रे फिरली आणि आज अखरे अटकेची कारवाई झाली.
एसआयटीच्या पथकाने आज सकाळी मुमुक्षू आश्रमातून चिन्मयानंद यांना अटक केली. वैदयकीय तपासणीसाठी त्यांना रुग्णालयात नेण्यात आलं असून आजच न्यायालयापुढे हजर करण्यात येणार आहे.
