जळगाव, दि. २१ (पीसीबी) : राजकीय आरोप प्रत्यारोपात तृतीयपंथी समाजाबद्दल अवमानकारक वक्तव्य केल्याने माजी खासदार निलेश राणे यांच्या विरोधात जळगावात अदखलपात्र गुन्हा दाखल करण्यात आला आहे. निलेश राणे आणि राष्ट्रवादीचे माजी आमदार रोहित पवार यांच्यात ट्विटर युध्द सुरु आहे. राज्यमंत्री आणि राष्ट्रवादीचे आमदार प्राजक्त तनपुरे यांना उद्देशून निलेश राणे यांनी टीका केली. त्यावेळी त्यांनी वापरलेल्या शब्दावर तृतीय पंथियांकडून आक्षेप घेण्यात आला आहे. जळगावच्या यावल तालुक्यातील फेजपूरच्या सामाजिक कार्यकर्ता भानुदास पाटील ऊर्फ शमिभा पाटील यांनी निलेश राणे यांच्याविरोधात पोलिसांत तक्रार केली. निलेश राणे यांनी तृतीयपंथी समाजावर उपहासात्मक आणि अब्रुनुकसानीकारक वक्तव्य केलं आहे, अशी प्रतिक्रिया शमिभा पाटील यांच्याकडून देण्यात आली आहे.
दरम्यान, याप्रकरणी निलेश राणे यांनी ट्विटरवर दिलगिरी व्यक्त केली आहे. “मी जर तृतीयपंथीयांच्या भावना दुखावल्या असतील तर मी दिलगिरी व्यक्त करतो. माझा रोख एका व्यक्तीवर होता इतर कोणावर नाही. पण तुम्ही माझ्यावर केसेस केल्या तरी चालतील कारण माझा उद्देश तुम्हाला दुखावण्याचा कधीच नव्हता”, असं निलेश राणे म्हणाले आहेत.
राष्ट्रवकवादीचे अध्यक्ष शरद पवार यांनी साखर उद्योगासाठी पॅकेजची मागणी केल्यानंतर निलेश राणेंनी त्यावर आक्षेप घेणारं ट्वीट केलं होतं. या ट्वीटला नातू रोहित पवार यांनी उत्तर दिल्यापासून दोघांमध्ये ट्विटर वॉर रंगलं आहे. या ट्विटर वॉरमध्ये प्राजक्त तनपुरे यांनी उडी घेतली होती.
“रोहित पवार यांनी अत्यंत सभ्य भाषेत आपले मत व्यक्त केले होते. पवार कुटुंबीयांच्या अंगी असलेल्या सभ्यपणा, सुसंस्कृतपणा, अभ्यासूपणा या गुणांमुळेच आमच्यासारखे असंख्य कार्यकर्ते पवार कुटुंबियांवर मनापासून प्रेम करतात. आणि हो, राष्ट्रवादी टप्प्यात आल्यावर मात्र कार्यक्रम करतात”, असं ट्विट प्राजक्त तनपुरे यांनी यांनी केलं होतं. याच ट्विटवरुन निलेश राणे यांनी तनपुरे यांच्यावर खालच्या पातळीवर टीका केली होती.
