नाशिक, दि. ७ (पीसीबी) – राज्यात लोकसभा निवडणुकीचे मतदान झाल्यानंतर आता राज्याचे माजी उपमुख्यमंत्री छगन भुजबळ हे मंगळवारपासून मध्यप्रदेश दौऱ्यावर जाणार आहेत. मध्य प्रदेशचे माजी मुख्यमंत्री दिग्विजय सिंग यांच्यासह काँग्रेस आघाडीच्या उमेदवारांचा प्रचार भुजबळ जाहीर सभेतून करणार आहेत.
राज्यात लोकसभा निवडणुकीचे मतदान झाल्यानंतर आता राज्याचे माजी उपमुख्यमंत्री छगन भुजबळ हे मंगळवारपासून मध्यप्रदेश दौऱ्यावर जाणार आहेत. मध्य प्रदेशचे माजी मुख्यमंत्री दिग्विजय सिंग यांच्यासह काँग्रेस आघाडीच्या उमेदवारांच्या प्रचार भुजबळ जाहीर सभेतून करणार आहेत.
भोपाळ येथील निवडणुकीत मालेगाव बॉम्बस्फोट प्रकरणातील मुख्य आरोपी साध्वी प्रज्ञा सिंग यांना भाजपने उमेदवारी दिल्यामुळे ही निवडणूक चर्चेत आली आहे. त्यामुळे भुजबळ साध्वी प्रज्ञा सिंग व भाजप विरोधात काय बोलतात हे महत्त्वाचे ठरणार आहे. भुजबळ हे मंगळावारी सकाळी ११.३० वाजता भोपाळ येथे पत्रकार परिषदेस संबोधित करणार आहेत. त्यानंतर काँग्रेस आघाडीचे उमेदवार दिग्विजय सिंग यांच्या प्रचारार्थ नरेला विधानसभा येथे त्यांची सभा होणार आहे. त्याचप्रमाणे भोपाळ दक्षिण पश्चिम विधानसभा राहुलनगर येथे आयोजित सभांसह काँग्रेस आघाडी उमेदवारांचा ते प्रचार करणार आहेत.
भुजबळांनी समता परिषदेच्या माध्यमातून देशभर ओबीसी समाजाचे संघटन केले आहे. त्यामुळे त्यांच्या सभेला राष्ट्रीय पातळीवर महत्त्व आहे. त्याचप्रमाणे ते आक्रमक बोलत असल्यामुळे त्यांना मध्य प्रदेशमध्ये सभेसाठी बोलावण्यात आले असून, त्यांची तोफ आता हिंदीतून या प्रदेशात धडाडणार आहे.
