पुलवामा, दि. १८ (पीसीबी) – पुलवामा जिल्ह्यातील अनंतनाग येथे सुरू असलेल्या सुरक्षा दल आणि दहशतवाद्यांमधील चकमकीत हिजबुल मुजाहिद्दीनचा दहशतवादी शौकत अहमद धर याच्यासह दोन दहशतवाद्यांना कंठस्नान घालण्यात सुरक्षा दलाला यश आले आहे. अनंतनागमध्ये दोन्ही बाजूंनी जोरदार गोळीबार सुरू असल्याचे वृत्त आहे.
जम्मू-काश्मीरमधील अवंतीपोरामधील पंजगाम गावात आज पहाटे दहशतवादी आणि १३० बटालियन सीआरपीएफ, ५५ आरआर आणि स्पेशल ऑपरेशन ग्रुप (एसओजी) यांच्या दरम्यान चकमक सुरू झाली. या चकमकीत शौकत अहमद धर ठार झाला.
जम्मू-काश्मीरच्या काही भागांमध्ये दहशतवादी हल्ला होण्याची माहिती सुरक्षा दलाला मिळाली आहे. संभाव्य याबाबत मिळालेल्या माहितीनुसार काश्मीर खोऱ्यात दहशत निर्माण करण्याचा दहशतवाद्यांचे मोठे प्रयत्न सुरू आहेत. हे लक्षात घेत संपूर्ण काश्मीर खोऱ्यात हाय अलर्ट घोषित करण्यात आला आहे.
काश्मीर खोऱ्यात गेल्या काही दिवसांपासून दहशतवादी आणि सुरक्षा दलांमध्ये चकमकी झाल्या आहेत. अशा परिस्थितीत दहशतवादाचा घोका केवळ सीमेपलिकडून येणाऱ्या दहशतवाद्यांकडूनच नसून, तो काश्मीर खोऱ्यात असलेल्या दहशतवाद्यांकडून देखील आहे. गुरूवारी देखील दहशतवादी आणि सुरक्षा दलात चकमक झाली. यात सुरक्षा दलाच्या जवानांनी ३ दहशतवाद्यांना कंठस्नान घातले होते.
