लातूर, दि. १६ (पीसीबी) – मोदींच्या ५६ इंच छातीची जाहीरपणे खिल्ली उडवत अभिनेता रितेश देशमुख याने लोकसभा निवडणुकीच्या रणधुमाळीत उडी घेतलीय. ‘५६ इंचाची छाती म्हणजे केवढी मोठी छाती असणार असा विचार मी करत होतो, अहो, ५६ इंचाचं तर गोदरेजचं कपाट येतं’ असं म्हणत रितेशनं पंतप्रधान नरेंद्र मोदी यांना लक्ष्य केलं. लातूर येथील काँग्रेस मेळाव्यात तो बोलत होता.
भारताला मिळालेले स्वातंत्र्य ही काँग्रेसची देणगी आहे, हे लक्षात ठेवा असं म्हणत त्यानं स्वातंत्र्य संग्रामातील काँग्रेसच्या योगदानाचीदेखील आठवण करून दिली. शिवाय, देश चालवायला ५६ इंचाची छाती नाही चांगले हृदय लागते, चांगले मन लागते असेही रितेश म्हणाला.
या मेळाव्यात बोलताना त्याने काँग्रेसमुळे देशात आणि महाराष्ट्रात झालेल्या चांगल्या बदलांनादेखील अधोरेखित केलं. तुमच्या खिशात असलेला मोबाईल ज्यामुळे तुम्ही फेसबुक, ट्विटर वापरू शकताय तो काँग्रेसने दिला आहे, लातूरमध्ये मोबाईल सेवा साहेबांनी आणली आहे असंही तो म्हणाला. रितेशचा हा व्हिडिओ सध्या सोशल मीडियावर तुफान व्हायरल होतो आहे. त्याच्या अनेक चाहत्यांनी हा व्हिडिओ त्यांच्या ट्विटर अकाउंटवरून ट्विट केला आहे.
