नवी दिल्ली, दि. २० (पीसीबी) – देशातील राजकीय पक्षांनी फेब्रुवारी २०१९पासून आजपर्यंत फेसबुक, गुगल आदी डिजिटल माध्यमांतून प्रचारासाठी ५३ कोटी रुपयांहून अधिक रक्कम खर्च केल्याचे दिसून आले आहे. त्यामध्ये सर्वाधिक खर्च भाजपने केला आहे. ‘फेसबुक’ने जाहिरातींच्या संदर्भात नुकत्याच जाहीर केलेल्या अहवालातून ही माहिती समोर आली आहे.
फेब्रुवारीच्या पहिल्या आठवड्यापासून १५ मे पर्यंत १.२१ लाख राजकीय जाहिरातींचे प्रसारण केल्याचे आढळून आले आहे. ‘फेसबुक’वरील जाहिरातींवर विविध राजकीय पक्षांनी २६.५ कोटी रुपये खर्च केले आहेत. या शिवाय गुगल, यूट्युब आणि अन्य ऑनलाइन कंपन्यांवर राजकीय पक्षांनी १९ फेब्रुवारीपासून आतापर्यंत १४,८३७ जाहिराती करून त्यापोटी २७.३६ कोटी रुपये खर्च केले आहेत.
केंद्रातील सत्ताधारी भाजपने ‘फेसबुक’वर केलेल्या २५००हून अधिक जाहिरातींसाठी ४.२३ कोटी रुपये खर्च केले आहेत. ‘माय फर्स्ट व्होट फॉर मोदी’, ‘भारत के मन की बात’ आणि ‘नेशन विथ नमो’ या फेसबुक पेजवरील जाहिरातींसाठी चार कोटी रुपये खर्च करण्यात आले आहेत. ‘गुगल’वरील जाहिरातींसाठी भाजपने १७ कोटी रुपयांहून अधिक खर्च केला आहे. प्रमुख विरोधी पक्ष कॉँग्रेसने ‘फेसबुकवर ३,६८६ जाहिरातींच्या माध्यमातून १.४६ कोटी रुपयांचा खर्च केला आहे. या शिवाय ‘गुगल’वर काँग्रेसने ४२५ जाहिराती केल्या असून, त्यावर २.७१ कोटी रुपयांचा खर्च केला आहे.
‘फेसबुक’ने दिलेल्या आकडेवारीनुसार तृणमूल कॉँग्रेसने ऑनलाइन जाहिरातींसाठी २९.२८ लाख रुपये खर्च केले आहेत. या शिवाय आम आदमी पक्षाने ‘फेसबुक’वर १७६ जाहिरातींच्या माध्यमातून १३.६२ लाख रुपये खर्च केले आहेत. ‘गुगल’ने दिलेल्या माहितीनुसार आम आदमी पक्षासाठी ‘ऑर्बर्न डिजिटल सोल्युशन्स’ ही कंपनी कार्यरत असून, तिने १९ मे पर्यंत २.१८ कोटी रुपयांचा खर्च केला आहे.
