मुंबई, दि, ९ (पीसीबी) – लोकलमधील मोबाइल चोराचा पाठलाग करताना प्रवाशांचा मृत्यू झाल्याची घटना चर्नी रोड स्थानकात उघडकीस आली आहे. शकील अब्दुल गफार शेख असे या प्रवाशाचे नाव असून ते घरी एकटेच कमावते होते. काही दिवसांपूर्वीच घरातील मोठ्या मुलाची नोकरी सुटल्याने शेख कुटुंबीय तणावाखाली होते. यातच घरातील कमावता पुरुष गेल्यामुळे शेखपरिवारावर दोन्ही बाजूने आघात झाला आहे. या प्रकरणी मोबाइल चोराला रेल्वे पोलिसांनी अटक केलीय.
जोगेश्वरी येथे राहणाऱ्या ५३ वर्षीय शकील शेख यांनी चर्चगेट येथे जाण्यासाठी रविवारी पहाटे लोकल पकडली. यावेळी द्वितीय दर्जाच्या डब्यातून प्रवास करत असताना शकील यांच्या सोबत त्यांचे मित्रही होते. रविवार सकाळची वेळ असल्याने लोकलमध्ये तुरळक प्रवासी होते. पहाटे ६.४५च्या सुमारास लोकल चर्नी रोड स्थानकात पोहोचताच आरोपीने शकील यांचा मोबाइल हिसकावून धावत्या लोकलमधून फलाटावर उतरून पळ काढला. शकील यांनी चोराचा पाठलाग करण्याचा प्रयत्न केला. दरम्यान लोकलने वेग घेतला होता. शकील यांनी फलाटावर उडी मारली. मात्र वेगाचा अंदाज न आल्याने फलाट आणि लोकल यांच्या पोकळीत चेंगरून शेख यांचा जागीच मृत्यू झाल्याची माहिती रेल्वे पोलिसांनी दिली.
शकील यांना २७ वर्षीय अरमान शेख आणि २२ वर्षीय सोहेल शेख असे दोन मुले आहे. काही दिवसांपूर्वी मोठा मुलगा अरमान याची नोकरी सुटल्याने घरात आर्थिक तंगी होती. धाकटा मुलगा सोहेल हा कॉलसेंटरमध्ये नोकरी करतो. शकील यांची पत्नी गृहिणी आहे. घरात आर्थिक चणचण असताना शकील यांचा अपघाती मृत्यू झाल्याने कुटुंबावर आभाळ कोसळले आहे.
दरम्यान, शकील यांचे अपघाती निधन रेल्वे प्रशासन आणि सुरक्षा यंत्रणांच्या ढिसाळ यंत्रणेमुळे झाला असून यात शकील यांची कोणतीही चूक नाही. अपघाती मृत्यू झाल्याने रेल्वे प्रशासनाने भरपाई द्यावी, अशी मागणी शकील शेख यांचे नातलग प्रितेश यांनी केली आहे.
