मुंबई, दि. १० (पीसीबी) : मान्सूनमधला पाऊस बरसावा तशी योगी आदित्यनाथ आणि त्यांच्या साथीदारांवर मतं बरसली आहेत. सगळ्याच एक्झिट पोलने उत्तर प्रदेशात शत प्रतिशत भाजप येईल, असा विश्वास व्यक्त केला होता. अगदी तसंच झालंय, भाजपने ४०३ जागांपैकी २५० च्या वर जागांवर आघाडी मिळवलीय. योगींच्या याच विजयाची चर्चा संपूर्ण भारतभरात तर आहेच, पण शेजारील देश पाकिस्तानातदेखील आहे. उत्तर प्रदेशसह पाच राज्यांच्या निवडणुका, 2024 मध्ये होणाऱ्या लोकसभा निवडणुकीचा मार्ग ठरवतील, असा पाकिस्तानी मीडियाचा दावा आहे. यासोबतच पाकिस्तानची मीडिया योगी आदित्यनाथ यांचा भावी पंतप्रधान म्हणून उल्लेख करत आहे, तशी चर्चा करत आहे.
काँग्रेस म्हणते, ‘हा अनपेक्षित निकाल’; पण राहुल गांधी कार्यकर्त्यांना बोलले…
उत्तर प्रदेशातील ४०३ विधानसभा जागांवर मतमोजणी सुरु आहे. आतापर्यंतच्या कलांमध्ये भाजप पुन्हा सत्तेत येताना दिसत आहे. दुपारपर्यंत समोर आलेल्या कलांमध्ये भाजपने बहुमताचा आकडा पार केला आहे. त्याचवेळी, गेल्या निवडणुकीत 47 जागांवर मर्यादित राहिलेल्या समाजवादी पक्षाने यावेळी मात्र 100 पेक्षा अधिक जागांचा टप्पा ओलांडला आहे.
उत्तर प्रदेश निवडणूक निकालाचा परिणाम संपूर्ण देशावर होतो. मुळात दिल्लीच्या लाल किल्ल्यावर कुणालाही झेंडा फडकवायचा असेल तर त्याला उत्तर प्रदेशची साथ हवी असते, त्याशिवाय लोकसभेचं मैदान मारणं शक्य होत नाही. त्यामुळेच देशासह शेजारील राष्ट्राचं देखील यूपीच्या निवडणूक निकालाकडे लक्ष असतं. दुपारी ३ वाजेपर्यंत योगी अगदी सुस्साट होते. २५० हून अधिक जागांवर भाजप उमेदवार आघाडीवर होते. याचाच अर्थ योगी आदित्यनाथ पुन्हा एकदा यूपीचे मुख्यमंत्री बनणार, हे निश्चित. पाकिस्तानी मीडिया तर यूपीच्या निकालाला २०२४ लोकसभा निवडणुकीचे संकेत म्हणत आहे. म्हणजेच आताच्या निकालासारखेच २०२४ देखील परिणाम समोर येऊ शकतात, असं वार्तांकन पाकिस्तानी मीडिया करत आहे. तसंच मोदींनंतर योगी यांच्याकडे पुढचे पंतप्रधान म्हणून अनेक जण पाहत असल्याचं पाकिस्तानी मीडियाचा दावा आहे. तसं वार्तांकन पाकिस्तानी मीडिया करत आहे.
भाजपच्या एवढं दणदणीत यश मिळण्यामागचं राम मंदिर हे एक मोठे कारण असल्याचं सांगण्यात येत आहे. राम मंदिर बांधल्यामुळे बहुसंख्याक हिंदूंनी भाजपला मतदान केल्याचं अनेक जण म्हणत आहेत. द ट्रिब्यूनने लिहिले आहे की, “मणिपूर, गोवा आणि उत्तराखंडमधील लोकांनी भाजपच्या बाजूने विश्वास व्यक्त केला आहे. यासोबतच योगी आदित्यनाथ हे भाजपमध्ये भावी पंतप्रधानपदाचे उमेदवार असू शकतात”
मोदींची लोकप्रियता आणि योगींच्या लोककल्याणकारी योजनांमुळे उत्तर प्रदेशात लोकांनी भाजपला साथ दिली. ३७ वर्षानंतर यूपीमध्ये असं पहिल्यांदा घडत आहे की सत्तेत असलेल्या पक्षाला लोकांची पुन्हा पसंती लाभत आहे, योगींनी हा करिश्मा करुन दाखवला आहे, ‘असं डॉन’ने म्हटलंय.
