नागपूर,दि.२८ (पीसीबी) : वीज ग्राहकांना अखंडित वीजपुरवठा देण्यासाठी आवश्यक त्या सर्व उपाययोजना अत्यंत प्रभावीपणे करा. वीज जाण्याची पूर्वसूचना ग्राहकांना मिळालीच पाहिजे. यासाठी यंत्रणा अधिक कार्यक्षम बनवा. तसेच ज्या ठिकाणी अधिकाऱ्यांची व कर्मचाऱ्यांची अकार्यक्षमता दिसून येत असेल त्यांच्यावर कठोर कारवाई करावी, असे आदेश ऊर्जामंत्री ना.डॉ. नितीन राऊत यांनी आढावा बैठकीत दिले. ऊर्जामंत्री डॉ.राऊत यांनी आज व्हीडीओ कॉन्फसिंगद्वारे महावितरणच्या विदर्भ आणि मराठवाड्यातील विविध कामांचा आढावा घेतला. या बैठकीत बोलतांना ऊर्जामंत्री डॉ. राऊत म्हणाले की, ज्या भागात वसुलीचे प्रमाण कमी आहे, तेथील लोकप्रतिनिधींना विश्वासात घेऊन वसुलीचे प्रमाण वाढविण्यासाठी प्रयत्न करावे, असेही आदेश ऊर्जामंत्र्यांनी यावेळी दिले.
वीज ग्राहकांनाचा सुरळीत वीजपुरवठा मिळत नाही, ही गंभीर बाब आहे. त्यामुळे ग्राहकांना अखंडित वीजपुरवठा देण्यासाठी अधिकारी व कर्मचाऱ्यांनी अधिक सक्रियपणे कामे करावी. ज्या एजन्सीकडे ही कामे दिली आहेत, त्यांच्यावर जबाबदारी निश्चित करून कामांची गुणवत्ता तपासा आणि कामे संथपणे करीत असतील त्या एजन्सीला ब्लॅकलिस्ट करा, असे स्पष्ट आदेश ऊर्जामंत्री डॉ. राऊत यांनी या बैठकीत दिले. राज्यातील ज्या जिल्ह्याचे तापमान सरासरी ४५ अंश से.पेक्षा अधिक आहे, अशा जिल्ह्यातील ग्राहकांचा वीजपुरवठा खंडित होण्याचे प्रमाण अत्यल्प ठेवण्यासाठी विशेष योजना आखण्याचे आदेशही ऊर्जामंत्र्यांनी दिले.
