मुंबई, दि. २३ (पीसीबी) – कितीही चौकशा केल्या तरी माझे तोंड बंद होणार नाही. मी बोलतच राहणार, अशा शब्दांत मनसेचे अध्यक्ष राज ठाकरे यांनी सरकारला इशारा दिला. ईडीने तब्बल साडे आठ तास चौकशी केल्यानंतर घरी आल्यावर राज यांनी प्रसारमाध्यमांना मोजकीच प्रतिक्रिया देऊन त्यांची भूमिका स्पष्ट केली.
कितीही चौकशा केल्या तरी माझे तोंड बंद होणार नाही. माझे तोंड कुणीही बंद करू शकत नाही. मी माझे काम करतच राहील, असे राज ठाकरे यांनी सांगितले. ईडीने विचारलेल्या प्रत्येक प्रश्नांची उत्तरं देण्यात आल्याचेही ते म्हणाले. ईडीच्या कार्यालयात तब्बल साडे आठ तास चौकशीला सामोरे गेल्यानंतर राज ठाकरे रात्री नऊच्या सुमाराला कुटुंबीयांसह दादर येथील त्यांच्या कृष्णकुंज निवासस्थानी पोहोचले. यावेळी जमलेल्या शेकडो मनसे कार्यकर्त्यांनी जोरदार घोषणाबाजी करत त्यांचे स्वागत केले. कार्यकर्त्यांनी जल्लोष करत ‘गणपती बाप्पा मोरया’, ‘वंदे मातरम’च्या घोषणा दिल्या. कार्यकर्त्यांच्या या गराड्यातच त्यांनी प्रसारमाध्यमांशी थोडक्यात संवाद साधत त्यांची पुढील भूमिका स्पष्ट केली. दरम्यान, राज यांना उद्या ईडीने चौकशीला बोलावले नसले तरी भविष्यात ईडीकडून त्यांची पुन्हा चौकशी होणार असल्याचं सूत्रांनी सांगितले.
