युद्धाच्या ज्वाळांनी होरपळलेल्या पश्चिम आशियातून दिलासादायक बातमी समोर आली आहे. लेबनॉन आणि इस्रायल यांच्यात 10 दिवसांचा युद्धविराम (सीजफायर) जाहीर करण्यात आला असून या निर्णयामुळे संघर्षग्रस्त प्रदेशात तात्पुरती का होईना, शांततेची आशा निर्माण झाली आहे. अमेरिकेचे राष्ट्राध्यक्ष Donald Trump यांनी या युद्धविरामाची अधिकृत घोषणा केली आहे.
ट्रम्प यांनी सांगितले की, लेबनॉनचे राष्ट्राध्यक्ष Joseph Aoun आणि इस्रायलचे पंतप्रधान Benjamin Netanyahu यांच्याशी सकारात्मक आणि फलदायी चर्चा झाली. या चर्चेनंतर दोन्ही देशांनी औपचारिकरित्या 10 दिवसांचा युद्धविराम लागू करण्यास सहमती दर्शवली आहे. अमेरिकन वेळेनुसार हा युद्धविराम सायंकाळी 5 वाजल्यापासून प्रभावी होणार आहे.
गेल्या काही दिवसांपासून सुरू असलेल्या संघर्षामुळे परिस्थिती अत्यंत गंभीर झाली होती. इस्रायली हल्ल्यांमुळे लेबनॉनमध्ये मोठ्या प्रमाणावर जीवितहानी झाली असून मृतांची संख्या 2,196 वर पोहोचली आहे. या पार्श्वभूमीवर जाहीर झालेला युद्धविराम हा अत्यंत महत्त्वाचा टप्पा मानला जात आहे.
