शेअर मार्केटमध्ये गुंतवणूक केल्यास चांगला नफा मिळेल असे सांगून एका व्यक्तीची 71 लाख 70 हजार रुपयांची फसवणूक करण्यात आली. ही घटना 10 ऑगस्ट ते 8 ऑक्टोबर या कालावधीत ऑनलाईन माध्यमातून घडली. याप्रकरणी सायबर पोलीस ठाण्यात गुन्हा दाखल करण्यात आला आहे.
याप्रकरणी पीडित व्यक्तीने सायबर पोलीस ठाण्यात फिर्याद दिली आहे. त्यानुसार अनोळखी व्यक्ती आणि आठ बँक खातेधारकांच्या विरोधात गुन्हा दाखल करण्यात आला आहे.
पोलिसांनी दिलेल्या माहितीनुसार, आरोपींनी फिर्यादी व्यक्तीला त्यांच्या मोबाईल फोनवर लिंक पाठवली. तसेच त्यांना वेगवेगळ्या मोबाईल क्रमांकावरून संपर्क केला. शेअर मार्केटमध्ये गुंतवणूक केल्यास चांगला परतावा मिळेल, असे सांगितले गेले. त्यांना मोठ्या परताव्याचे आमिष दाखवून त्यांच्याकडून सुरुवातीला काही गुंतवणूक करून घेतली. त्याचा खोटा इलेक्ट्रॉनिक अभिलेख आरोपींनी तयार केला. त्यामध्ये फिर्यादी यांना मोठा नफा झाल्याचे दाखवण्यात आले. त्यामुळे फिर्यादी यांनी एकूण 71 लाख 70 हजार रुपयांची गुंतवणूक केली. त्यानंतर आरोपींनी त्यांना कोणताही नफा अथवा गुंतवणूक केलेली रक्कम परत न देता त्यांची फसवणूक केली. सायबर पोलीस तपास करीत आहेत.
