पिंपरी, दि. २५ – महायुतीच्या देवेंद्र फडणवीस सरकारचे पहिले अर्थसंकल्प अधिवेशन येत्या ३ मार्च पासून सुरू होणार आहे. युतीमध्ये विधानसभा अध्यक्षपदी भाजपचे आमदार राहुल नार्वेकर यांना पुन्हा एकदा संधी मिळाली. आता प्रश्न उपाध्यक्षपदाचा असून त्यासाठी एकनाथ शिंदे समर्थक की, अजित पवार समर्थक आमदाराला संधी द्यायची यावर बराच खल झाला. अजित पवार यांचे निष्ठावंत म्हणून पिंपरी राखीव मतदारसंघाचे आमदार अण्णा बनसोडे यांचे नाव या पदासाठी निश्चित करण्यात आल्याचे वृत्त आहे.
विधानसभा उपाध्यक्षपद विरोधकांना मिळावे, असा प्रस्ताव विरोधकांनी दिला होता. प्रत्यक्षात या पदावर भाजप, शिंदेंची शिवसेना आणि अजित पवार यांच्या राष्ट्रवादीतील आमदारालाच संधी देण्याचे ठरले. अजित पवार यांचा कट्टर समर्थक म्हणून आमदार बनसोडे यांचे नाव जवळपास निश्चित आहे. दुसरीकडे भाजपमधील जेष्ठ आमदार माजी मंत्री राजकुमार बडोले यांच्या नावाचा भाजपने आग्रह धरला आहे.
उपाध्यक्ष पदासाठी किमान कायद्याचे ज्ञान आणि सभागृह चालविण्याचा अनुभव आवश्यक आहे. आमदार बनसोडे यांना मंत्रिमंडळात राज्यमंत्री म्हणून संधी मिळणार होती मात्र, तिथे डावलले. तीन टर्म आमदार असल्याने पिंपरी चिंचवड शहरातील राष्ट्रवादी काँग्रेसचे अस्तित्व कायम ठेवण्यासाठी बनसोडे यांच्या नावावर शिक्कामोर्तब करण्यात आल्याचे समजले. आगामी महापालिका निवडणुकित राष्ट्रवादी काँग्रेस कार्यकर्त्यांना आकृष्ट करण्यासाठी बनसोडे यांच्यावर जबाबदारी देण्यात आली आहे.
दरम्यान, विधीमंडळातील नियम आणि एकूणच कामकाजात आमदार बनसोडे यांचा आजवर कुठेही सहभाग दिसला नाही. बनसोडे यांनी कुठेही कधी चर्चेत सहभाग किंवा प्रश्नोत्तरे, लक्षवेधी मांडल्याचे किंवा अल्पकाळ, दीर्घकाळ चर्चेत सहभाग घेतलेला नाही. सभा तालिकेवरही त्यांनी काम केलेले नाही. मात्र, यावेळी विरोधी बाकावरची संख्या अत्यंत कमी असल्याने यापुढे सभागृहात कुठलाही बाका प्रसंग उभा राहण्याची शक्यता दिसत नाही म्हणून अजितदादांनी आमदार बनसोडे यांच्यासाठी शिफारस केली.
भाजपचे राजकुमार बडोले सुध्दा प्रयत्नात –
मुख्यमंत्री देवेंद्र फडणवीस यांना कुठेही अडचण येऊ नये यासाठी या पदावर त्यांना अनुभव संपन्न व्यक्ती पाहिजे आहे. राजकुमार बडोले यांनी २०१४ मध्ये न्याय मंत्री म्हणून काम सांभाळले असून ते उच्चशिक्षित आहेत. विधानसभा सभा तालिकेवरही त्यांनी काम केलेले असल्याने सभागृह कसे चालवायचे याचाही त्यांना अनुभव आहे. अशा परिस्थितीत बनसोडे की बडोले अशी तुलना सुरू झाली आहे. स्वतः फडणवीस हे बडोले यांच्या गळ्यात उपाध्यक्षपदाची माळ घालू इच्छितात, अशी चर्चा आहे.
