मुंबई,दि. १४ (पीसीबी) : बॉलिवूड मधील अनेक रथीमहारथी आता कोरोनाच्या विळख्यात येत असल्याने चित्रपट वर्तुळात घबराट आहे. अभिनेत्री सारा अली खानच्या ड्रायव्हरला कोरोनाची बाधा झाली आहे. त्याला मुंबई पालिकेच्या क्वारंटाईन सेंटरमध्ये दाखल करण्यात आलं आहे. सुदैवाने साराच्या संपूर्ण कुटुंबियांची कोरोना टेस्ट निगेटिव्ह आली आहे. तिने स्वत: इन्स्टाग्रामवर पोस्ट टाकून याबाबतची माहिती दिली.
सारा अली खानच्या ड्रायव्हरला कोरोनाची लागण झाल्याचे समजताच मुंबई पालिकेच्या क्वारंटाईन सेंटरमध्ये दाखल करण्यात आले आहे. त्यानंतर तिची आई अभिनेत्री अमृता सिंग, इब्राहिम अली खान, सारा अली खान आणि इतर लोकांच्या टेस्ट करण्यात आली. सुदैवाने या सर्व टेस्ट निगेटिव्ह आल्या आहेत, अशी माहिती साराने दिली आहे.
साराने इन्स्टाग्राम टाकलेल्या पोस्टनुसार, “आमच्या ड्रायव्हरचा कोरोना रिपोर्ट पॉझिटिव्ह आला आहे. त्याला पालिकेच्या क्वारंटाईन सेंटरमध्ये दाखल करण्यात आला आहे. यानंतर मी आणि माझ्या कुटुंबातील सर्वांची कोरोना चाचणी करण्यात आली आहे. तसेच घरातील इतर कर्मचाऱ्यांच्याही चाचण्या करण्यात आल्या. या सर्वांच्या चाचण्या निगेटिव्ह आल्या आहेत.”
“मात्र तरीही आम्ही सर्वजण खबरदारी घेत आहोत. मला आणि माझ्या कुटुंबाला सहकार्य केल्याबद्दल मी मुंबई महापालिकेचे आभार व्यक्त करते,” अशी पोस्ट साराने इन्स्टाग्रामवर टाकली आहे.
दरम्यान बॉलिवूडमध्ये दबदबा असलेल्या बच्चन कुटुंबात कोरोनाने शिरकाव केला आहे. आधी महानायक अमिताभ बच्चन, त्यानंतर त्यांचे पुत्र-अभिनेता अभिषेक बच्चन आणि त्यानंतर सून-अभिनेत्री ऐश्वर्या राय बच्चन आणि नात आराध्या बच्चन यांना कोरोनाची लागण झाल्याचे समोर आले. सुदैवाने बिग बी यांच्या पत्नी आणि खासदार-अभिनेत्री जया बच्चन, त्यांची कन्या श्वेता बच्चन-नंदा, नात नव्यानवेली नंदा, नातू अगस्त्य नंदा यांचे रिपोर्ट निगेटिव्ह आले आहेत.
