निगडी, दि. १५ (पीसीबी) – चॉपरचा धाक दाखवून रिक्षा चालकाला दोघांनी मिळून लुटले. ही घटना मंगळवारी (दि. 13) रात्री अकरा वाजता पीसीएमसी वसाहत येथे घडली. या दोघांना निगडी पोलिसांनी बेड्या ठोकल्या आहेत.
सुनील पोपट गायकवाड (वय 24, रा. निगडी), अक्षय उर्फ गोट्या संजय छत्री (वय 26, रा. पिंपरी) अशी अटक केलेल्या दोन चोरट्यांची नावे आहेत. याबाबत पियुष बापू चव्हाण (वय 20, रा. यमुनानगर, निगडी) यांनी बुधवारी (दि. 14) निगडी पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, फिर्यादी चव्हाण हे रिक्षा चालक आहेत. पीसीएमसी वसाहत येथे मंगळवारी रात्री अकरा वाजता आरोपींनी त्यांना चॉपरचा धाक दाखवून त्यांच्या खिशातून तीन हजार रुपये जबरदस्तीने काढून घेतले. याबाबत पोलिसांना माहिती मिळाल्यानंतर पोलिसांनी दोन्ही चोरट्यांना अटक केली आहे. निगडी पोलीस तपास करीत आहेत.
