दि.०७(पीसीबी)-मंगळवारी सकाळच्या सत्रात भारतीय शेअर बाजारात मोठी घसरण पाहायला मिळाली असून, गुंतवणूकदारांमध्ये चिंतेचं वातावरण निर्माण झालं आहे.सेन्सेक्स तब्बल 1.05 टक्क्यांनी घसरून 73,326.61 अंकांवर पोहोचला, तर निफ्टी 50 सुमारे 0.9 टक्क्यांनी घसरून 22,771.75 अंकांवर आला. केवळ लार्जकॅपच नव्हे, तर मिडकॅप आणि स्मॉलकॅप निर्देशांकांमध्येही जवळपास 1 टक्क्यांची घसरण झाली, ज्यामुळे बाजारात सर्वत्र विक्रीचा दबाव दिसून आला.
दरम्यान, इंडिगो, झोमॅटोची पॅरेंट कंपनी ‘इटर्नल’, महिंद्रा अँड महिंद्रा, स्टेट बँक ऑफ इंडिया, अॅक्सिस बँक आणि एशियन पेंट्स या प्रमुख कंपन्यांच्या शेअर्समध्ये 2 ते 3 टक्क्यांची घसरण झाली. यामुळे गुंतवणूकदारांचे मोठ्या प्रमाणात नुकसान झाल्याचे चित्र आहे.
तथापि, काही आयटी आणि वित्तीय क्षेत्रातील शेअर्स तुलनेने स्थिर राहिले. बजाज फायनान्स, टेक महिंद्रा, एचसीएल टेक आणि आयटीसी या कंपन्यांच्या शेअर्समध्ये मोठा परिणाम दिसून आला नाही, तर काहींमध्ये किंचित वाढही नोंदवली गेली.
जागतिक घडामोडींचाही या घसरणीवर मोठा प्रभाव दिसून येत आहे. इराण-अमेरिका तणावामुळे निर्माण झालेली अनिश्चितता आणि कच्च्या तेलाच्या वाढत्या किंमती यामुळे बाजारावर दबाव वाढला आहे. आंतरराष्ट्रीय बाजारात कच्च्या तेलाचे दर प्रति बॅरल 110 डॉलरपर्यंत पोहोचल्याने गुंतवणूकदारांनी सावध भूमिका घेतली आहे.
सेक्टोरल पातळीवर निफ्टी ऑटो इंडेक्सला सर्वाधिक फटका बसला असून त्यात 2 टक्क्यांहून अधिक घसरण झाली आहे. निफ्टी पीएसयू बँक निर्देशांकातही सुमारे 1.9 टक्क्यांची घट झाली. मात्र, निफ्टी मेटल इंडेक्समध्ये 0.7 टक्क्यांची वाढ नोंदवली गेली.
याशिवाय, बाजारातील अस्थिरतेचा अंदाज देणारा इंडिया VIX निर्देशांक जवळपास 2 टक्क्यांनी वाढला असून, गुंतवणूकदारांमध्ये भीतीचे वातावरण कायम असल्याचे दिसत आहे.सध्याच्या परिस्थितीत गुंतवणूकदारांनी सावध राहून विचारपूर्वक निर्णय घेण्याची गरज व्यक्त केली जात आहे.
