दि.०२(पीसीबी)-पुणे महापालिकेने ओव्हरहेड वायर विरोधात मोहीम उघडली आहे. “स्वतंत्र पथकांची स्थापना करून शहरात पसरलेल्या अनधिकृत आणि धोकादायक ओव्हरहेड केबल्स हटविण्याची धडक मोहीम महापालिकेने बुधवारपासून सुरू केली. विशेषतः गायरोप केबल्स आणि विविध टेलिफोन कंपन्यांच्या केबल्स अनियमित पद्धतीने टाकल्यामुळे शहराचे सौंदर्य बाधित झाले असून, जीवित हानी होण्याचा धोका वाढला आहे. त्यामुळे ही कारवाई करत असून, ती दर आठवड्याला विविध भागात राबविले जाईल अशी माहिती स्थायी समितीचे अध्यक्ष श्रीनाथ भिमाले यांनी दिली. दरम्यान अशा प्रकारची मोहीम पिंपरी चिंचवड महापालिकेने राबवली पाहिजे अशी मागणी देखील होत आहे.
महानगरपालिकेचा विद्युत विभाग, अतिक्रमण विभाग आणि अग्निशमन विभाग यांच्या संयुक्त कारवाईतून आज पुणे सातारा रस्त्यावरील आदिनाथ सोसायटी परिसरातील अनधिकृत केबल्सवर कारवाई करण्यात आली. या कारवाईनंतर भिमाले पत्रकारांशी बोलत होते. विद्युत विभागाच्या मुख्य अभियंता मनिषा शेकटकर, कार्यकारी अभियंता योगेश माळी, उप अभियंता जयदीप अडसूळ, अतिक्रमण विभागाचे उपायुक्त सोमनाथ बनकर, मुख्य अग्निशमन अधिकारी पोटफोडे, सहाय्यक विभागीय अधिकारी विजय भिलारे, स्टेशन ऑफिसर प्रभाकर उमरकर, समीर शेख, प्रदीप खेडेकर यांच्या मार्गदर्शनाखाली कारवाई करण्यात आली.
भिमाले म्हणाले, नुकत्याच केलेल्या सर्वेक्षणात महानगरपालिका क्षेत्रात ३,६०० किलोमीटर लांबीच्या केबल्स अनधिकृत असल्याचे निदर्शनास आले आहे. नियमांनुसार केवळ भूमिगत केबल टाकण्याची परवानगी असतानाही अनेक कंपन्यांनी अनधिकृतपणे खांबांवर केबल्स टाकून शहराचे विद्रुपीकरण केले आहे. शहरातील अनेक रस्ते, तसेच चौक आणि इमारतींवर गुंतागुंतीचे अनधिकृत केबलचे जाळे निर्माण झाले असून, त्यामुळे अपघात झाले आहेत. काही कंपन्या गाईडरोपचा वापर करतात. त्यात ॲल्युमिनियम तारांचा समावेश असल्याने प्रवाही विजेचा शॉक बसून मनुष्यहानी होण्याची भीती आहे. त्यामुळे या अनधिकृत केबल्सवर टप्प्याटप्प्याने धडक कारवाई केली जाणार आहे.
भिमाले पुढे म्हणाले, केबल्स टाकण्यासाठी महापालिकेची पूर्वपरवानगी आणि शुल्क अनिवार्य करण्यात आलेले आहे.विविध प्रकारच्या सेवा पुरविणाऱ्या कंपन्यांनी महानगरपालिकेकडून रितसर परवानगी घेऊन भूमिगत केबलच टाकाव्यात. या नियमांचे उल्लंघन करणाऱ्या कंपन्यांवर पुढील काळात कठोर दंडात्मक कारवाई करण्यात येईल.
विद्युत विभागाच्या मुख्य अभियंता मनीषा शेकटकर म्हणाल्या, जानेवारीपासूनच काही भागांतील प्राथमिक कारवाईत आतापर्यंत १२३.६ किलोमीटर लांबीच्या अनधिकृत केबल्स हटविण्यात आल्या आहेत. आता ही मोहीम अधिक तीव्र करण्यात येणार आहे.
पुणे शहराचे सौंदर्य वाढवण्यासाठी आणि सुरक्षिततेसाठी अनधिकृत ओव्हरहेड केबल्सवर आता कठोर कारवाई करण्यात येणार आहे. अशा अनधिकृत केबल्समुळे शहरात अपघातांचा धोका वाढला असून, संबंधित कंपन्यांनी नियमांचे पालन करत भूमिगत केबल टाकण्यास प्राधान्य द्यावे, असे आवाहन पुणे महानगरपालिकेच्या स्थायी समितीचे अध्यक्ष श्रीनाथ भिमाले यांनी केले आहे. या मोहिमेमुळे शहर अधिक सुंदर आणि सुरक्षित होण्यास मदत होईल, असा विश्वासही त्यांनी व्यक्त केला आहे.
