पुणे, दि. ४ : पुण्यात एका आयटी इंजीनीयरची कोट्यावधी रुपयांची एका भोंदु बाबाने फसवणूक केल्याची माहिती समोर आली आहे. शंकर महाराज अंगात येतात आणि ते दुर्धर आजार बरे करतील असं सांगून पुण्यातील एका आयटी इंजीनीयरची तब्बल १४ कोटी रुपयांना एका भोंदु बाबाने फसवणूक केली आहे. दिपक डोळस नावाचे आयटी इंजीनियर आणि त्यांची शिक्षक पत्नी यांना भोंदू बाबाच्या सापळ्यात अडकून आपली आयुष्यभराची कमाई गमाऊन बसण्याची वेळ आली आहे. ज्यामध्ये डोळस यांच्या पुण्यातीलच नव्हे तर इंग्लंडमधील घराचा देखील समावेश आहे. या भोंदु बाबांचं नाव दिपक खडके असून या भोंदू बाबाला वेदिका पंढरपुरकर या त्याच्या शिष्येने फसवणूक करण्यात मदत केली आहे.
वेदिकाच्या अंगात शंकर महाराज येतात आणि ते सांगतील तसं लागलं पाहिजे असा दावा करुन दिपक डोळस यांना त्यांच्या कोट्यावधींच्या मालमत्ता विकण्यास भाग पाडण्यात आलं. विशेष म्हणजे हे सर्व पैसे आरटीजीएसने राजेंद्र खडके आणि वेदिका पंढरपुरकर यांनी त्यांच्या बॅंक खात्यांवर वळते करुन घेतले आहेत. २०१८ पासुन हा प्रकार सुरु होता. दिपक डोळस, त्यांची पत्नी दोन मुलींना राजेंद्र खडकेच्या दरबारात नेण्यात आले. तिथे वेदिका पंढरपुरकर हीने तीच्या अंगात शंकर महाराज येतात अशी अॅक्टींग केली. त्यानंतर तुमच्याकडे संपत्ती ठेवल्यास तुम्हाला येतील असे सांगून बॅंकेतील सर्व पैसे आणि ठेवी वेदिका यांच्या खात्यात वळत्या करायला लावल्या.
मात्र तरीही डोळस यांच्या मुली बऱ्या न झाल्याने त्यांनी खडके आणि पंढरपुरकर यांच्याकडे विचारणा केली असता त्यांनी तुमच्या घरात दोष आहेत असं सांगितलं. डोळस हे काही वर्ष इंग्लंडमध्ये नोकरी करत होते. त्यामुळे त्यांचं इंग्लंडमध्ये देखील घर होतं आणि फार्महाऊस खरेदी केले होते. ते इंग्लंडमधील घर आणि फार्म हाऊस त्यांना विकायला लावण्यात आलं आणि ते पैसे पंढरपुरकर यांच्या खात्यात वळते करण्यात आले. त्यानंतर डोळस यांना त्यांचा पुण्यातील प्लॉट आणि फ्लॅट विकण्यास सांगण्यात आलं आणि ते पैसे देखील हडप करण्यात आले.
आपल्या दोन लहान मुली बऱ्या होतील या अपेक्षेने डोळस सर्व करत गेले. मात्र मुली बऱ्या होत नाहीत असं लक्षात आल्यावर त्यांनी पुन्हा खडके आणि वेदिका पंढरपुरकर यांच्याकडे विचारणा केली असता त्यांनी त्यांच्या राहत्या घरात दोष असल्याचे सांगितले. मात्र आता राहण्यासाठी एकमेव घर उरले असल्याचं डोळस यांनी सांगितले आणि घर विकण्यास असमर्थता दर्शवली. त्यानंतर डोळस यांना ते घर तारण ठेऊन घरावर लोन काढण्यास सांगण्यात आलं. त्यानंतर पर्सनल लोन देखील काढण्यास सांगण्यात आलं. हा सगळा पैसा राजेंद्र खडके आणि वेदिका पंढरपुरकर यांनी हडप केला आणि त्या पैशातून कोथरुड येथील महात्मा सोसायटीत आलीशान बंगला खरेदी केला आहे.
या सगळ्या प्रकाराबद्दल वेदिका पंढरपुरकर या़ंच्याशी संपर्क करण्याचा आम्ही प्रयत्न केला. एबीपी माझाची टीम त्यांच्या महात्मा सोसायटीतील आकाशदिप या बंगल्यात पोहचली. या बंगल्यात अनेक कर्मचारी उपस्थित होते. मात्र या कर्मचार्यांनी वेदिका आणि त्यांचे पती कुनाल तुम्हाला भेटु इच्छित नाहीत असं सांगितलं.
