दि.१२(पीसीबी)-बंडू आंदेकर याच्या घरावर पुणे पोलिसांनी टाकलेल्या छाप्यात हाती मोठे घबाड लागले आहे. मकोका कारवाई झाल्यानंतर पहिल्यांदाच बंडू आंदेकर याच्या घरावर पोलिसांनी छापा टाकला. यावेळी त्याच्या घरातून मोठं घबाड सापडल्याची माहिती समोर आली आहे. पोलिसांना आंदेकरच्या घरातून रोख रकमेसह सोने-चांदीचे दागिने, कुलमुखत्यारपत्र, साठेखत अशा गोष्टी सापडल्या आहेत.
वर्षभरापूर्वी नाना पेठेत झालेल्या वनराज आंदेकर खूनाचा बदला म्हणून या प्रकरणातील अटकेत असलेल्या आरोपी गणेश कोमकर याचा मुलगा आयुष कोमकर यांच्यावर आंदेकर टोळीनं दिवसाढवळ्या गोळ्या झाडून गेम वाजवला. . या प्रकरणात पोलिसांना 13 जणांना अटक केली आहे, आठ जणांवर मकोका अंतर्गत कारवाई करण्यात आली आहे.दरम्यान, या कारवाईनंतर बुधवारी (दि. १०) सायंकाळी पाच ते गुरुवारी (दि. ११) पहाटे चारपर्यंत बंडू आंदेकरच्या घराची झडती सुरू होती. गुन्हे शाखेसह समर्थ पोलिस ठाण्याचे अधिकारी-कर्मचारी यावेळी उपस्थित होते.
काय सापडलं बंडू आंदेकरच्या घरात?
करण्यात आलेल्या झडतीत वृंदावनी, स्वराज आणि तुषार यांच्या घरातून २१ हजार रोख, १६ मोबाईल, दागिन्यांच्या पावत्या आणि एक दुचाकी जप्त करण्यात आली, तर टोळीचा म्होरक्या बंडू यांच्या घरातून ७७० ग्रॅम सोन्याचे दागिने त्याची आजच्या बाजार भावानुसार ८५ लाखांहून अधिक किंमत आहे. ३१ हजार रुपयांची चांदी आणि २ लाख ४५ हजारांची रोकड पोलिसांनी जप्त केली.
बंडू आंदेकरच्या घरात १० पेक्षा अधिक साठेखत, पॉवर ऑफ अॅटर्नी, बँकेचे पासबुक, एक कार, विविध करारनामे, टॅक्स पावत्या, पेनड्राईव्ह इतका मुद्देमाल जप्त करण्यात आला आहे. तब्बल ११ तास पोलिसांकडून ही मालमत्ता जप्तीची कारवाई सुरू होती.
पोलिस आयुक्त अमितेश कुमार, पोलिस सहआयुक्त रंजन कुमार शर्मा, अपर पोलिस आयुक्त पंकज देशमुख, पोलिस उपायुक्त निखिल पिंगळे यांच्या मार्गदर्शनाखाली आयुष कोमकरच्या खुनाचा तपास सुरू आहे.
