(पीसीबी) दि. २० : पिंपरी चिंचवडमध्ये पुन्हा एक हुंडाबळीची घटना घडली आहे. वैष्णवी हगवणे प्रकरण ताजे असतानाच सासरच्या कुटुंबाच्या जाचाला कंटाळून आणखी एका उच्चशिक्षित तरुणीने मृत्यूला कवटाळले आहे. दिव्या हर्षल सूर्यवंशी वय 26 वर्ष असे या विवाहितेचे नाव आहे. विशेष बाब म्हणजे, नवरा आयटी अभियंता आहे.
वाकड पोलीस स्टेशन हद्दीतील उच्चभ्रू सोसायटीत ही घटना घडली. राहत्या घरात दिव्या सूर्यवंशी हिचा गळफास घेतलेला मृतदेह आढळून आला आहे. मात्र दिव्याने आत्महत्या केली नसून तिच्या नवऱ्याने आणि सासरच्या मंडळीने तिचा खून केल्याचा आरोप दिव्याच्या माहेरच्या नातेवाईकानी केला आहे.
माहेरून सोनं आणावे आणि फर्निचर बनवण्यासाठी पैसे आणावे या मागणीसाठी हर्षलचा नवरा आणि सासरचे तिचा छळ करत होते. या प्रकरणी हर्षलच्या सासरच्या मंडळींविरोधात पोलिस ठाण्यात तक्रार दाखल करण्यात आली आहे.
मिळालेल्या माहितीनुसार, वाकड पोलिस ठाण्याच्या हद्दीतील W 57 या उच्चभ्रू सोसायटीत सोमवारी संध्याकाळी ही धक्कादायक घटना घडली. मूळची धुळे जिल्ह्यातील तसेच शेतकरी कुटुंबातील असलेली दिव्या भाऊसाहेब खैरनार ही उच्चशिक्षित तरुणी होती. तिचा विवाह जवळपास ३ वर्षांपूर्वी हर्षल शांताराम सूर्यवंशी या आयटी इंजिनिअर तरुणासोबत झाला होता.
हर्षल सूर्यवंशी वारंवार दिव्याच्या कुटुंबीयांकडे सोन्याच्या दागिन्यांची मागणी करत होता. तसेच त्याने घरातील फर्निचर बनवण्यासाठी माहेरून पैसे आणण्यासाठी तगादा लावला होता. यासाठी तिचा मानसिक छळ करण्यात आल्याचा आरोप दिव्याच्या नातेवाईकांकडून करण्यात आला आहे. दिव्याच्या मृत्यूस कारणीभूत ठरलेल्या हर्षल आणि त्याच्या कुटुंबीयांविरोधात कठोर कायदेशीर कारवाई करून त्यांना कठोरात कठोर शिक्षा देण्यात यावी अशी मागणी दिव्याच्या नातेवाईकांनी केली आहे.
