मुंबई, दि. २७ (पीसीबी) – जाणते आजोबा नातवडांसमोर मुके.. मुके, आजोंबाच्या डोळयासमोर आता राजकीय धुके.. धुके.. धुके, अशा शब्दात भाजपाचे नेते आशिष शेलार यांनी राष्ट्रवादी काँग्रेसचे अध्यक्ष शरद पवार यांच्यावर निशाणा साधला आहे.
एकाच घरातील किती जणांनी निवडणूक लढवायची, असा सवाल करीत नव्या पिढीला संधी देण्याकरिता निवडणूक लढविणार नाही, असे शरद पवार यांनी काही दिवसांपूर्वी जाहीर केले होते. अजित पवार यांचे चिरंजीव पार्थ पवार यांच्यासाठी शरद पवार यांनी मावळ मतदारसंघातून माघार घेतली होती. तर शरद पवारांचे दुसरे नातू रोहित पवार यांनी निर्णयाचा पुनर्विचार करावा, असे आवाहन आजोबांना केले होते. एका नातवासाठी पवारांना माघार घ्यावी लागली असतानाच दुसऱ्या नातवाने विरोधात भूमिका घेतल्याने पवार कुटुंबातच सारे काही आलबेल नाही, अशी चर्चा सुरु झाली.
या पार्श्वभूमीवर भाजपाचे मुंबईतील नेते आशिष शेलार यांनी ट्विटरच्या माध्यमातून राष्ट्रवादी काँग्रेसवर निशाणा साधला. आशिष शेलार ट्विटमध्ये म्हणतात, एक नातू म्हणाला आजोबा आजोबा निवडणुका तुम्हीच लढवा…दुसरा नातू म्हणाला आजोबा आजोबा मीच “पार्थ” मीच लढणार…आजोबांना होती ताईंची काळजी…दादांना पोराची.. जाणते आजोबा नातवडांसमोर मुके.. मुके.. मुके.. आजोंबाच्या डोळयासमोर आता राजकीय धुके.. धुके.. धुके.