दि. २५ ( पीसीबी ) – तीन वेगवेगळ्या नावाने भारतामध्ये बेकायदेशीरपणे वास्तव्य करणाऱ्या एका बांगलादेशी व्यक्तीला भोसरी पोलिसांनी अटक केली. ही कारवाई रविवारी (दि. २३) रात्री साडेआठ वाजताच्या सुमारास बनाचा ओढा, भोसरी येथे करण्यात आली.
अटक केलेल्या आरोपीकडे नयन रतन सरकार (वय २१, रा. क्रिष्णापूर, लोहागारा, जि. नराईल, बांगलादेश), राकेश रतन सरकार (रा. घोला नादिया, पश्चिम बंगाल), सुमित शंकर भक्ता (रा. नाकाशी पारा, पश्चिम बंगाल) अशा तीन नावाची कागदपत्रे आढळून आली. त्याचे मूळ नाव नयन सरकार असे आहे. तो सध्या लेबर कॅम्प, दिघी येथे वास्तव्य करत होता. त्याने बांगलादेश मधून पश्चिम बंगाल मध्ये अनधिकृतपणे घुसखोरी करून प्रवेश केला. त्यानंतर तो कामाच्या निमित्ताने पुणे येथे आला होता.
भोसरी पोलिसांकडून दररोज रात्री सहा ते नऊ वाजताच्या कालावधीत नाकाबंदी लावली जाते. रविवारी नाकाबंदी सुरु असताना एक दुचाकीस्वार (एमएच १२/बीएल ३६६) संशयितपणे जात असल्याचे पोलिसांच्या निदर्शनास आले. पोलिसांनी दुचाकीस्वाराला अडवून त्याच्याकडे चौकशी केली असता त्याच्या बोलण्यात तफावत आढळून आली. त्याच्याकडील बॅगची तपासणी केली असता त्यामध्ये वेगवेगळ्या नावाची कागदपत्रे आढळून आली. तसेच तो बांगलादेशी असल्याचे निदर्शनास आले. नादिया पश्चिम बंगाल येथील भारतीय मतदान कार्ड, बांगलादेश येथील लोहागारा, जि. नराईल येथील लक्ष्मीपाशा आदर्श सेकंडरी स्कुल या शाळेचा दाखला आढळून आला.
भोसरी पोलिसांनी नयन रतन सरकार याला अटक केली. परकीय नागरिक आदेश, परकीय नागरिक कायदा यासह भारतीय न्याय संहितेच्या विविध कलमान्वये गुन्हा दाखल करण्यात आला आहे. तो मागील एक वर्षापासून पिंपरी-चिंचवड शहरात बेकायदेशीर वास्तव्य करत आहे. तसेच मेस आणि कन्स्ट्रक्शन साईट वर काम करत होता. नयन सरकार याला न्यायालयात हजर केले असता त्याला तीन दिवसांची पोलीस कोठडी मिळाली आहे. पोलीस उपनिरीक्षक श्रीकांत गुरव तपास करीत आहेत.
