दि. 10 (पीसीबी) – तरुणाला जीवे मारण्याच्या उद्देशाने पाच जणांनी त्याच्यावर वार करत बेदम मारहाण केली. तसेच परिसरात दहशत निर्माण केली. ही घटना बुधवारी (दि. ८) सायंकाळी साडेसहा वाजता आकाशगंगा सोसायटीच्या मोकळ्या मैदानाजवळ, रहाटणी येथे घडली.
याप्रकरणी मन्सुर मेहबुब शेख (वय २४, रा. काळेवाडी) यांनी काळेवाडी पोलिस ठाण्यात फिर्याद दिली आहे. त्यानुसार, बप्पा सातपुते, दिपक सातपुते (रा. थेरगाव), वैभव पहाडे यांच्यावर गुन्हा दाखल केला आहे. तर सुरज प्रकाश पिंगळे (२४, रा. रहाटणी व शुभम अभिमान जाधव (रा. गुजरनगर) या दोघांना अटक केली आहे.
पोलिसांनी दिलेल्या माहितीनुसार, फिर्यादी व संशयित आरोपी सुरज पिंगळे यांच्यामध्ये एक महिन्यापूर्वी वाद झाला होता. बुधवारी फिर्यादी व त्यांचा मित्र प्रसाद चव्हाण उभे असताना त्यांना सूरज यांने बोलावून घेतले. त्यावेळी मागच्या भांडणाचा राग मनात धरून बाकी साथीदारांना बोलावत फिर्यादी मन्सुर शेख यांना मारहाण केली. ‘ तू काय इथला भाई झालाय का, मी इथला भाई आहे, माझी दहशत माहित नाही का तुला’ असे म्हणत बप्पा सातपुते याने मन्सुर यांच्यावर चाकूने वार केला. तर दिपक याने त्याच्या हातातील कोयत्याने वार केला. मात्र तो फिर्यादीने चुकवला. फिर्यादीचा मित्र प्रसाद चव्हाण वाचवण्यासाठी आला असता त्याला देखील मारहाण केली.
