सातारा,दि. १५ : प्रेमसंबंधातून तृतीयपंथीयाने लग्नाचा तगादा लावल्याने त्याचा गळा आवळून खून केला. नंतर वीजवाहक तारेने मृतदेहाच्या कंबरेस वजनदार दगड बांधून विहिरीत टाकून दिल्याची धक्कादायक घटना म्हसवड (ता. माण) येथे घडली.मृत तृतीयपंथी राशी ऊर्फ राहुल अजिनाय घुटुकडे (वय २५) याच्या खुनाचा तपास सहा तासांत लावण्यात म्हसवड पोलिसांना यश आले. याप्रकरणी समाधान विलास चव्हाण (रा. दिवड, ता. माण) यास पोलिसांनी अटक केली.
मसाईवाडी (म्हसवड) गावच्या हद्दीतील एका विहिरीत अनोळखी मृतदेह कुजलेल्या स्थितीत दिसल्याचे म्हसवड पोलीस ठाण्यात कळवले गेले.मृतदेहाची ओळख पटविणे आव्हानात्मक असताना पोलिसांनी हातावर गोंदलेल्या नावाचे आधारे मृताच्या नातेवाइकांचा शोध घेतला. ही माहिती समाजमाध्यमावर प्रसारित केली. त्या वेळी मृताच्या नातेवाइकांचा संपर्क झाला. त्या वेळी मृत व्यक्ती मोटेवाडी (ता. माण) येथील तृतीयपंथी राशी ऊर्फ राहुल असल्याचे निष्पन्न झाले.
पुढील तपासात मृताचे आणि संशयित समाधान विलास चव्हाण यांचे प्रेमसंबंध असल्याचे निष्पन्न झाले. त्यावरून समाधान चव्हाण यास ताब्यात घेतले. त्याने खुनाची कबुली दिली. आपले व राशी ऊर्फ राहुलचे प्रेमसंबंध होते. माझ्याशी लग्न कर आणि मला घरी घेऊन चल, असा तगादा लावला होता, म्हणून मी त्यास ठार मारून मृतदेहाची विल्हेवाट लावून पुरावा नष्ट केल्याचे सांगितले. त्यावरून समाधान चव्हाण यास अटक करण्यात आली आहे. अधिक तपास म्हसवड पोलीस करत आहेत.
