गांधीनगर, दि. 09 (पीसीबी) : गुजराच्या कच्छमध्ये सराफा व्यावसायिकाच्या घरावर सक्तवसुली संचलनालयाचा छापा पडला. त्यानंतर तपास यंत्रणांनी या सगळ्या प्रकरणाची चौकशी केली. स्वत:ची ओळख ईडीचे अधिकारी अशी करुन देणाऱ्या आरोपींचा पर्दाफाश झाला आहे. बोगस ईडी अधिकाऱ्यांनी घरात घुसून सोने व्यापाऱ्याला धमकावलं होतं. खरीखुरी माहिती द्या. काहीही लपवू नका, अन्यथा तुरुंगवारी घडेल, अशी धमकी आरोपींनी दिली होती. या संपूर्ण घटनेचा व्हिडीओ आता समोर आला आहे.
राधिका ज्वेलर्सच्या मालकाच्या घरी धाड टाकण्यासाठी गेलेल्या आरोपींनी कुटुंबातील चारही सदस्यांना धमकावलं. कुटुंबात २ महिला सदस्या होत्या. कोट घालून आलेल्या एकानं स्वत:ची ओळख अंकित तिवारी अशी करुन दिली. त्यानं त्याचं ओळखपत्रही दाखवलं. त्यात ईडीचा उल्लेख होता. गोपनीय माहितीच्या आधारे छापा टाकल्याचं त्यानं सांगितलं. तुम्ही सगळ्यांनी सहकार्य केल्यास प्रकरण लवकर मिटेल, अन्यथा गुंता वाढेल, असं कोटधारी व्यक्तीनं सांगितलं. कुटुंबावर दबाव वाढवण्यासाठी त्यानं संपूर्ण प्रक्रियेची व्हिडीओग्राफी सुरु केली.
आरोपींच्या टोळीतील एक जण सगळ्या घटनांचं चित्रण करत होता. तुम्ही योग्य माहिती द्या. मग आम्ही आमचं काम सुरु करतो, असं अंकित तिवारीनं सांगितलं. तुम्ही दिलेली माहिती चुकीची निघाल्यास सहा वर्षांसाठी तुरुंगवास होईल, अशी भीती कुटुंबाला दाखवण्यात आली. तुमच्याकडे सोनं, रोकड किती आहे, असे प्रश्न बोगस अधिकाऱ्यांकडून विचारण्यात आले. त्यावर आम्हाला नेमकी माहिती नसल्याचं पीडित कुटुंबानं सांगितलं. आम्ही तुम्हाला वेळ देतो. त्या वेळेत सगळा ऐवज बघून घ्या. त्यावेळी तुमच्यासोबत आमच्या पथकातील एक सदस्य असेल, असं त्यांना सांगण्यात आलं.
घरात एकूण रोकड किती? सोनं किती? हिरे आहेत का? कोणत्या वस्तूंची बिलं आहेत आणि कोणत्या वस्तूंची नाहीत? अशी प्रश्नांची सरबत्तीच पीडित कुटुंबावर करण्यात आली. या सगळ्या प्रकरणाबद्दल समजताच कच्छ पूर्वचे पोलीस अधीक्षक सागर बागमार यांनी तपास सुरु केला. तेव्हा धाड टाकणारे सगळेच बोगस अधिकारी असल्याचं समोर आलं. अंकित तिवारी अशी ओळख सांगणाराच या टोळीचा म्होरक्या असून त्याचं खरं नाव शैलेंद्र देसाई असल्याचं पोलीस तपासातून निष्पन्न झालं. तो अहमदाबादच्या DRM कार्यालयात दुभाष्या म्हणून काम करतो.
ईडी अधिकारी असल्याची बतावणी करत अंकित तिवारीच सुटाबुटात सराफा व्यावसायिकाच्या घरात घुसला आणि लाखो रुपयांचा ऐवज लंपास करत पसार झाला. या प्रकरणी तक्रार मिळताच पोलिसांनी तपास सुरु केला. पोलिसांनी एकूण १२ जणांना अटक केली. पोलिसांना छापेमारीत ३ कार आणि १ दुचाकी सापडली. त्यांचा वापर गुन्ह्यात झाला. पोलिसांनी आतापर्यंत २५ लाखांची रोकड जप्त केली आहे. हा आकडा वाढू शकतो.
