भोपाळ, दि. ३० (पीसीबी) – एकेकाळी भाजपसाठी आक्रमक प्रचार करणारे काँग्रेस नेते नवजोत सिंग सिद्धू आता भाजपविरोधात जोरदार प्रचार करत आहेत. भाजप कार्यकर्ते मात्र सिद्धू यांच्यावर प्रचंड भडकले आहेत. बैतूल येथे सिद्धू यांच्या सभेनंतर सभास्थानाचे या कार्यकर्त्यांनी शुद्धीकरण केलं आहे.
सोमवारी नवजोत सिंग सिद्धू यांनी बैतूल येथे काँग्रेस उमेदवार रामू टेकाम यांच्यासाठी प्रचारसभा घेतली. या प्रचारसभेत नवजोत सिंग सिद्धू यांनी पंतप्रधान मोदींवर प्रचंड आगपाखड केली. ‘भाजपचे सगळे नेते पंतप्रधान मोदींच्या नावाने मत मागतात. पण मोदी मात्र सैन्याच्या नावाने मत मागतात. आता तुम्हीच सांगा यांना मतदान करणार का?’ असा सवालच सिद्धू यांनी विचारला. मोदींवर केलेली ही टीका भाजपच्या स्थानिक कार्यकर्त्यांना चांगलीच झोंबली. त्यांनी सभा स्थळी येऊन सिद्धूंचा प्रचंड निषेध केला.
तर सभा संपल्यानंतर हे कार्यकर्ते पवित्र तापी नदीचे पाणी घेऊन आले आणि त्यांनी सभा स्थळाचे पाणी शिंपडून शुद्धीकरण केलं. यामुळे भाजप –काँग्रेस कार्यकर्त्यांमध्ये वादावादी आणि हाणामारीही झाली. अखेर पोलिसांनी घटनास्थळी पोहचून भांडण थांबवले. सध्या सिद्धू देशभर फिरून भाजपाविरोधत विखारी प्रचार करत आहे. तर सिद्धू पाक धार्जिणे असल्याचा आरोप भाजपचे नेते त्यांच्यावर करत आहे. आता सिद्धू यांच्या प्रचाराचा भाजपला फायदा होतो का हे पाहणं महत्त्वाचं ठरणार आहे.
