लाहोर, दि. ६ (पीसीबी) : अंडरवर्ल्ड डॉन दाऊद अर्थात दाऊद इब्राहिम कासकरचा कोरोनाने मृत्यू झाल्याची जोरदार चर्चा सुरु झाली आहे. अनेकजण याबाबतचे अंदाज वर्तवत आहेत, मात्र सरकारने याबाबत कोणतीही पुष्टी केलेली नाही. अनेक सोशल साईट्सवर दाऊदच्या मृत्यूचं वृत्त पसरलं आहे, मात्र त्याबाबत अद्याप अधिकृत दुजोरा मिळालेला नाही.
1993 मध्ये मुंबईत झालेल्या साखळी बॉम्बस्फोट प्रकरणातील फरार अंडरवर्ल्ड डॉन दाऊज इब्राहिम आणि त्याची पत्नी महजबीन ‘कोरोना’ची लागण झाल्याचे वृत्त कालच सर्वत्र आलं होतं. पाकिस्तानमधील उच्चपदस्थ सरकारी अधिकाऱ्यांच्या हवाल्याने हे वृत्त दिले जात होतं. दाऊदला कराचीमधील लष्करी रुग्णालयात दाखल करण्यात आल्याचं या वृत्ताद्वारे सांगण्यात आलं. मात्र आज त्याच्या मृत्यूची अफवा पसरली आहे.
जगभरात धुमाकूळ घालणाऱ्या कोरोना संसर्गाने पाकिस्तानातही पाय पसरले आहेत. कोरोनाची लागण दाऊदच्या सुरक्षा रक्षकांना आणि त्यानंतर दाऊद आणि त्याच्या पत्नीलाही झाल्याचं सांगण्यात आलं. त्यामुळे दाऊदला कराचीतील मिलिट्री रुग्णालयात दाखल करण्यात आल्याची माहिती पाकिस्तानी मीडियात पसरली.
मुंबई बाँम्ब स्फोटातील मुख्य सुत्रधार –
गुन्हेगारी विश्वाचा कुख्यात डॉन दाऊद इब्राहिमने मुंबई आणि परिसरात अनेक गुन्ह्यांची मालिका उघडली. अंडरवर्ल्ड डॉन दाऊद इब्राहिम कासकर हा गुन्हेगारी विश्वाचा बादशाह म्हणून ओळखला जातो. भारतासाठी दाऊद मोस्ट वॉन्टेड आहे. 64 वर्षीय डॉन दाऊद इब्राहिम हा मुंबईवरील 1993 मधील साखळी बॉम्बस्फोटाचा मास्टरमाईंड आहे. या स्फोटात ३०० निष्पाप नागरिकांचा बळी गेला होता. त्याला फरफटत आणायची वल्गना अनेक राजकीय नेत्यांनी केली, पण अखेरपर्यंत तो पाकिस्तानात असल्याचे माहित असूनही अटक झाली नाही.
दाऊदचा जन्म मुंबईतील डोंगरीचा आहे. तो सध्या पाकिस्तानातील कराचीमध्ये राहत असल्याचा दावा केला जातो. भारत आणि अमेरिकेने 2003 मध्ये दाऊदला ‘आंतरराष्ट्रीय दहशतवादी’ घोषित केले आहे. 1993 च्या बॉम्बस्फोटांमधील भूमिकेबद्दल त्याच्यावर 25 मिलियन अमेरिकन डॉलर्स इतके बक्षीस आहे.
दाऊद आपल्या देशात नसल्याचं सांगत पाकिस्तानने अनेक वेळा हात झटकण्याचा प्रयत्न केला आहे. परंतु कराचीमध्ये त्याच्यावर उपचार होत असल्याचे वृत्त खरे ठरल्यास पाकिस्तानचा खोटारडेपणा पुन्हा उघडकस येईल.
