दि.०६(पीसीबी)-मध्यपूर्वेत सुरू असलेल्या तणावाच्या पार्श्वभूमीवर इराणकडून कुवेत आणि संयुक्त अरब अमिरात (UAE) वर हल्ले झाल्याची माहिती समोर आली आहे.कुवेतच्या वीज आणि पाणी मंत्रालयाने दिलेल्या माहितीनुसार, रविवारी (५ एप्रिल २०२६) इराणकडून करण्यात आलेल्या ड्रोन हल्ल्यात दोन वीज निर्मिती व पाणी मिठविरहित प्रकल्पांचे मोठे नुकसान झाले आहे. या हल्ल्यामुळे दोन वीज निर्मिती युनिट्स बंद पडली असून “लक्षणीय भौतिक नुकसान” झाल्याचे मंत्रालयाने X (ट्विटर) वर पोस्टद्वारे सांगितले. सुदैवाने, या घटनेत कोणतीही जीवितहानी किंवा जखमी झाल्याची नोंद नाही.
दरम्यान, संयुक्त अरब अमिरातनेही आपल्या हवाई संरक्षण प्रणाली सक्रिय केल्याची माहिती दिली आहे. यूएईच्या संरक्षण मंत्रालयाने सांगितले की, देशावर होणाऱ्या क्षेपणास्त्र आणि ड्रोन हल्ल्यांना प्रत्युत्तर देण्यासाठी हवाई संरक्षण यंत्रणा सतर्कपणे काम करत आहे. मात्र, या हल्ल्यांचा नेमका स्रोत कोणता याबाबत अधिकृत माहिती देण्यात आलेली नाही.
इराणच्या अधिकृत IRNA वृत्तसंस्थेनुसार, इराणच्या सैन्याने यूएईमधील “अॅल्युमिनियम उद्योग” आणि कुवेतमधील अमेरिकन लष्करी पायाभूत सुविधांना लक्ष्य केले असल्याचा दावा केला आहे.या घटनांमुळे मध्यपूर्वेतील तणाव आणखी वाढण्याची शक्यता व्यक्त केली जात असून, जागतिक स्तरावर चिंतेचे वातावरण निर्माण झाले आहे.
