नाशिक, दि. 07 (पीसीबी) : नाशिक-पुणे सेमी हायस्पीड रेल्वे प्रकल्पाचा नव्याने तयार करण्यात येत असलेला आराखडा (डीपीआर) अंतिम टप्प्यात असल्याची माहिती केंद्रीय रेल्वेमंत्री अश्विनी वैष्णव यांनी खासदार राजाभाऊ वाजे यांना दिली. त्यामुळे या प्रकल्पाचे काम लवकरच सुरू होईल, असा दावा वाजे यांनी केला आहे.
नाशिक ते पुणे सेमी हायस्पीड प्रकल्प लवकरच पूर्णत्वास जाण्यासाठी खासदार वाजे यांनी शुक्रवारी (दि. ६) केंद्रीय रेल्वेमंत्री वैष्णव यांची भेट घेतली. या प्रकल्पाबाबत वैष्णव आणि वाजे यांच्या दिल्ली येथे झालेल्या बैठकीत सविस्तर चर्चा झाली. या प्रकल्पाला मागील काही वर्षांत अनेक अडचणी आल्याने प्रकल्प रखडला आहे. आता याबाबत खासदार वाजे यांनी पाठपुरावा सुरू केला आहे. हा रेल्वेमार्ग शिर्डीमार्गे होणार, की संगमनेरमार्गे होणार असा प्रश्न होता. मात्र, खासदार वाजे यांनी सातत्याने रेल्वेमंत्री वैष्णव यांच्याकडे पाठपुरावा केल्यानंतर हा रेल्वे प्रकल्प जुन्याच प्रस्तावित मार्गाने होईल, असे निश्चित करण्यात आले.
दरम्यान, ‘महारेल’च्या माध्यमातून बनवण्यात आलेल्या आराखड्यात (डीपीआर) नारायणगाव येथील ‘जीएमआरटी’ आणि नॅशनल सेंटर फॉर रेडिओ ॲस्ट्रोफिजिक्सद्वारे चालवली जाणारी जायंट मेट्रोवेव्ह रेडिओ टेलिस्कोप (रेडिओ दुर्बीण) या सुरक्षेच्या दृष्टिकोनातून अत्यंत संवेदनशील असलेल्या प्रकल्पातून रेल्वेमार्ग प्रस्तावित करण्यात आला होता. मात्र, ही बाब रेल्वे मंत्रालयाला लक्षात येताच त्याबाबत आता नव्याने आराखडा (डीपीआर) बनवण्याच्या कामाला खासदार वाजे आणि रेल्वेमंत्री वैष्णव यांच्या ऑक्टोबर महिन्यात झालेल्या बैठकीनंतर मान्यता देण्यात आली होती.
नारायणगाव येथील जीएमआरटी प्रकल्पाला वळसा घालून नव्याने रेल्वेमार्गाचा डीपीआर बनवला जात आहे. शुक्रवारी (दि. ६) झालेल्या बैठकीत नवा डीपीआर अंतिम टप्प्यात असल्याची माहिती मंत्री वैष्णव यांनी खासदार वाजे यांना दिली. या पंचवार्षिक काळात देशाला विकसित भारत म्हणून वाटचाल करायची आहे, त्यामुळे हा प्रकल् देखील लवकरच पूर्ण करण्यासाठी प्रयत्न करू, असे आश्वासनही त्यांनी दिले.
फडणवीस, पवारांची घेणार भेट
नवीन ‘डीपीआर’मध्ये नारायणगाव येथील ‘जीएमआरटी’ला वळसा दिला जाणार आहे. यामुळे किमान ६० ते ९० किलोमीटरचे अंतर वाढून अर्ध्या तासाचा वेळ वाढणार आहे. नाशिक ते पुणे सेमी हायस्पीड रेल्वेमार्गाबाबत, तसेच जुन्याच मार्गाने हा मार्ग होण्याबाबत नवनिर्वाचित मुख्यमंत्री देवेंद्र फडणवीस, तसेच उपमुख्यमंत्री अजित पवारदेखील आग्रही आहेत. त्यामुळे या दोन्ही नेत्यांनाही भेटून प्रकल्प लवकर सिद्धीस जाण्यासाठी वैयक्तिक लक्ष घालावे, अशी विनंती करणार असल्याचे खासदार वाजे यांनी सांगितले.
