पिंपरी,दि.३१(पीसीबी) – साहित्यसम्राट लोकशाहीर अण्णाभाऊ साठे यांच्या जयंतीनिमित्त क्रांतिवीर चापेकर स्मारक समिती आणि सामाजिक समरसता मंच यांच्या वतीने अण्णाभाऊ साठे जयंती महोत्सवातील भोजनव्यवस्थेसाठी लागणारा शिधा संकलित करून क्रांतिवीर चापेकर स्मारक समिती अध्यक्ष पद्मश्री गिरीश प्रभुणे यांच्या हस्ते अण्णाभाऊ साठे जयंती महोत्सव समितीकडे सुपुर्द करण्यात आला. यावेळी अण्णाभाऊ साठे महोत्सव समितीचे अध्यक्ष अण्णा कसबे, माजी अध्यक्ष मनोज तोरडमल, समरसता गतिविधी जिल्हा सहसंयोजक नरेंद्र पेंडसे, क्रांतिवीर चापेकर स्मारक समिती कार्यवाह ॲड. सतीश गोरडे, अमोल देशपांडे, महेंद्र बोरकर यांची प्रमुख उपस्थिती होती.
याप्रसंगी कार्यकर्त्यांचे प्रबोधन करताना गिरीश प्रभुणे यांनी, “संत तुकाराम महाराज यांनी आपल्या अभंगांतून समाजातील अज्ञान, अंधश्रद्धा यांच्यावर शाब्दिक प्रहार करीत समाजजागृती केली; तर तुकाराम भाऊराव साठे अर्थात अण्णाभाऊ साठे यांनी आपल्या साहित्यातून सामाजिक समरसता प्रस्थापित केली!” असे विचार मांडले. शिधा संकलनासाठी तानाजी साठे, अतुल आडे तसेच क्रांतिवीर चापेकर स्मारक समिती आणि सामाजिक समरसता मंचाच्या कार्यकर्त्यांनी परिश्रम घेतले. शाहीर आसराम कसबे यांनी सूत्रसंचालन केले आणि आभार मानले.
