– सामना अग्रलेखातून विरोधी पक्षांना एकजूट करण्याचे शिवसेनेचे आवाहन
मुंबई, दि. १६ (पीसीबी) : भाजपच्या विरोधात एकत्र यावे, असे प्रत्येक विरोधी पक्षास वाटते, पण एकत्र यावे कसे? या प्रश्नाचे उत्तर विरोधकांना शोधावे लागणार आहे. दिल्लीत सर्व भाजप विरोधकांनी एकत्र यावे व एकमुखाने बोलावे एवढीच अपेक्षा आहे. विरोधकांच्या ऐक्याची खिचडी न पकणे, विरोधकांची दहा तोंडे हेच भाजपचे बलस्थान आहे, अशा शब्दात ‘सामना’च्या अग्रलेखातून शिवसेनेने विरोधी पक्षांना एकजूट होण्याचं आवाहन केलं आहे. प्रत्येकाने आपले राज्य सांभाळले तरी पुरे. आघाडीचे नेतृत्व कोणी करावे? पंतप्रधानपदाचा चेहरा कोण? वगैरे नंतर पाहता येईल. आधी ‘ईडी-पीडा’ टळावी यासाठी अग्नी पेटवा, खिचडी आपोआप शिजत जाईल, अशी अपेक्षाही व्यक्त करण्यात आली आहे. राज्यात महाविकास आघाडी एकत्र लढली, तर ३५ जागा जिंकण्याचा विश्वासही अग्रलेखातून बोलून दाखवण्यात आला आहे. म्हणजेच मिशन ४५+ ची स्वप्नं पाहणाऱ्या भाजपला एकप्रकारे १३ जागांवर रोखण्याचा निर्धारने शिवसेनेने केल्याचं दिसतंय.
‘सामना’च्या अग्रलेखात काय?
भारतीय जनता पक्षाच्या यशाचे श्रेय विरोधकांचे जे विखुरलेपण आहे, त्या बेकीस द्यायला हवे. विरोधक एकीची वगैरे भाषा बोलतात, पण ते योग्य वेळी जणू ठरवून एकमेकांचा हात सोडतात.आताही 2024 ला सर्व विरोधकांनी एकत्र येऊन भारतीय जनता पक्षाला सत्तेपासून दूर ठेवावे यावर बैठका, चर्चा, भेटीगाठी यांना बहर आला आहे. मात्र प्रश्न इतकाच आहे की, प्रत्येक जण वेगवेगळ्या तोंडाने का बोलतोय? एकमुखाने का बोलत नाही? शरद पवार हे देशाच्या राजकारणातले सध्याचे पुराणपुरुष आहेत. त्यांच्या राष्ट्रवादी काँग्रेसचे अधिवेशन दिल्लीत पार पडले. पवारांनी त्यांच्या भाषणात देशातील सर्व भाजप विरोधकांना एकत्र येण्याचे आवाहन केले. भाजपला केंद्रातून सत्ताभ्रष्ट करण्यासाठी बिगरभाजप पक्षांनी एकत्र यावे असे पवार यांनी स्पष्टच सांगितल्याचा उल्लेखही ‘सामना’च्या अग्रलेखात करण्यात आलाय.
विरोधकांना गप्प करण्यासाठी मोदी सरकार ईडी, सीबीआयसारख्या पेंद्रीय यंत्रणांचा वापर करीत आहे व या संकटांशी एकत्रित सामना करावा लागेल असे पवार यांनी सांगितले ते खरेच आहे. पवार हे दिल्लीत असे षड्डू ठोकत असतानाच तिकडे हैदराबादेत तेलंगणाचे मुख्यमंत्री के. चंद्रशेखर राव व कर्नाटकचे माजी मुख्यमंत्री एच. डी. कुमारस्वामी यांची भेट झाली. त्या भेटीनंतर के. चंद्रशेखर राव यांनी ”भाजपमुक्त भारत असा संकल्प आपण सोडलेला आहे व त्यासाठी केंद्रात भाजपविरोधी आघाडी स्थापन करू. त्यासाठी एका राष्ट्रीय पक्षाची स्थापना करू,” असा फटाका फोडला. राव हे अलीकडे पाटण्यात जाऊन मुख्यमंत्री नितीश कुमार यांना भेटले होते. त्याआधी ते मुंबईत येऊन आम्हाला भेटले होते. त्यावेळी त्यांनी 2024 च्या लढ्याची योजना आमच्या समोर ठेवली होती. अर्थात चंद्रशेखर राव यांची भूमिका स्पष्ट आहे व त्यांनीही भाजपच्या ईडी-सीबीआयच्या दुरुपयोगाविरोधात आवाज उठवला आहे, पण विरोधकांना एकत्र आणण्यासाठी ते स्वतःचा नवा राष्ट्रीय पक्ष का स्थापन करीत आहेत? त्या पक्षाच्या छत्राखाली ते कोणाला घेणार आहेत? राव यांचा तेलंगणा राष्ट्रीय समिती हा एक प्रादेशिक पक्ष आहे व बाजूच्या आंध्रातही त्यांच्या पक्षाचा तेवढा जोर नाही. त्यामुळे राव यांनी त्यांच्या राज्यातले भाजपचे आव्हान थोपवून धरले तरी पुरे, असंही ‘सामना’च्या अग्रलेखात म्हटलंय.
याचवेळी बिहारचे मुख्यमंत्री नितीश कुमार हे दिल्लीस पोहोचले व त्यांनी काही विरोधी पक्षांच्या गाठीभेटी घेतल्या. त्यात पवार, लालू यादव, राहुल गांधी आहेत. 2024 साली विरोधकांनी एकत्र यावे असे नितीश कुमारांनाही वाटते. नितीशबाबूही एक आघाडी स्थापन करण्याच्या विचारात आहेत. त्या आघाडीत नक्की कोण येणार? ममता बॅनर्जी या एकांड्या शिलेदार आहेत. त्या बंगालपुरतेच बघतात. बंगालात काँग्रेस किंवा डाव्यांना त्या विरोधी आघाडीत स्थान देणार आहेत काय, हा प्रश्न आहे. सध्या तरी ममता बॅनर्जी यांची भाषा सर्व विरोधकांनी एकत्र यावे अशी आहे. नितीश कुमार, झारखंडचे मुख्यमंत्री हेमंत सोरेन वगैरे आम्ही एकत्रच असल्याचे ममता बॅनर्जी यांनी जाहीर केले, पण ही एकीची भाषा शेवटपर्यंत टिकेल काय? दिल्ली व पंजाबात केजरीवाल यांचा ‘आप’ भाजपविरोधी आहे, पण त्यांचा घोडा नेहमीच वेगळ्या दिशेने जातो. उत्तरेत मायावतींचे राजकारण हे भाजपला मदत होईल असेच घडते. अखिलेश यादव त्यांच्या बाहुबली काकांशी जुळवून घेत नाहीत. काही राज्यांत काँग्रेस पक्ष नक्कीच आपली ताकद राखून आहे आणि राहुल गांधी यांची ‘भारत जोडो’ यात्रा बरी चालली आहे. महाराष्ट्रात शिवसेनेसह महाविकास आघाडी एकत्र लढली तर लोकसभेच्या 35 जागा जिंकेल असे राज्याचे वातावरण आहे. जम्मू-कश्मीरात गुलाम नबी आझाद व महाराष्ट्रात शिंदे गट भाजपच्या फायद्यास येणार नाही, याबाबत कुणाच्या मनात शंका नाही. मात्र विरोधक 2024 चे लक्ष्य ठेवतात व वेगवेगळ्या तोंडाने भाजपवर तोफा उडवतात, हा खरा प्रश्न आहे, असंही ‘सामना’च्या अग्रलेखात म्हटलंय
