पिंपरी, दि. २० (पीसीबी) : भाजपचे आमदार लक्ष्मण जगताप यांचे नुकतेच निधन झाल्याने चिंचवड विधानसभेची पोटनिवडणूक जाहीर करण्यात आली आहे. या निवडणुकीत भाजपकडून लक्ष्मण जगताप यांच्या पत्नी अश्विनी जगताप यांना उमेदवारी मिळण्याची शक्यता आहे. अश्विनी जगताप यांना उमेदवारी मिळाल्यास ही निवडणूक बिनविरोध होण्याची दाट शक्यता आहे. मात्र, लक्ष्मण जगताप यांचे बंधू शंकर जगताप यांनाही तिकीट मिळण्याची शक्यता वर्तवली जात आहे. शंकर जगताप यांना तिकीट मिळाल्यास चिंचवडमध्ये निवडणूक होण्याची शक्यता आहे. त्यामुळेच राष्ट्रवादीचे नेते नाना उर्फ विठ्ठल काटे यांनी शड्डू ठोकला आहे. सर्व अंदाज बांधूनच काटे निवडणुकीच्या कामाला लागले आहेत. त्यांचे कार्यकर्तेही कामाला लागले असून पोस्टरबाजी सुरू केली आहे. काटे यांनी थेट प्रचारच सुरु केला आहे.
राष्ट्रवादीचे माजी नगरसेवक नाना उर्फ विठ्ठल काटे हे 2014 च्या विधानसभा निवडणुकीत पराभूत झाले होते. त्यावेळी विजयी भाजपचे उमेदवार लक्ष्मण जगताप यांना १ लाख २३ हजार, दुसऱ्या क्रमांकाचे शिवसेनेचे राहुल कलाटे यांना ६३ हजार, तर तिसऱ्या क्रमांकावर राष्ट्रवादीचे उमेदवार म्हणून काटे यांना४३ हजार व राष्ट्रवादीचेच अपक्ष मोरेश्वर भोंडवे यांना १३ हजार मते होती.२०१९ च्या निवडणुकीत अपक्ष उमेदवार म्हणून उभे राहिलेल्या राहुल कलाटे यांना देखील लक्ष्मण जगताप यांनी पराभूत केले होते. त्यावेळी जगताप यांचा पाडाव करण्यासाठी राष्ट्रवादीने आपले वजन कलाटे यांच्या पारड्यात टाकले होते म्हणून त्यांना तब्बल १ लाख १२ हजार मते होती, तर जगताप यांना दीड लाख मते मिळून ते विजयी झाले होते. आता नाना ऊर्फ विठ्ठल काटे यांनी पुन्हा एकदा निवडणुकीच्या रिंगणात उभं राहण्याचा निर्णय घेतला आहे. तर जगताप यांच्या भावकीतील माजी नगरसेवक नवनाथ जगताप हे देखील निवडणुकीच्या रिंगणात उतरण्याच्या तयारीत आहेत. ऐनवेळी नवनाथ जगताप निवडणुकीचा अर्ज भरून या निवडणुकीची रंगत वाढवण्याची चिन्हे वर्तवली जात आहेत. त्यामुळे नवनाथ जगताप यांच्या निर्णयाकडे सर्वांचं लक्ष लागलं आहे. आमदार जगताप यांच्या भाऊबंदकितील नवनाथ जगताप यांचे नाव चर्चेत आल्याने भाजपचे संभाव्य उमेदवार शंकर जगताप यांची मोठी कुचंबना होऊ शकते.
चिंचवडची निवडणूक जाहीर होताच येथील राजकारण ढवळून निघाले आहे. या निमित्ताने सोशल मीडियावर राजकीय वॉर सुरू झालं आहे. ‘राजा का बेटा, राजा नहीं बनेगा. राजा वही बनेगा, जो काबील होगा’ अशा आशयाची सूचक आणि बालकी पोष्ट सोशल मीडियावर काटे समर्थक व्हायरल करतांना दिसत आहे. त्यामुळे काटे हे निवडणुकीत उभे राहणार असल्याचं निश्चित मानलं जात आहे.मी माझी तयारी करत आहे. शेवटी पक्षश्रेष्ठी निर्णय घेईल, असं चिंचवड विधानसभा पोटनिवडणुकीतील इच्छुक उमेदवार नाना उर्फ विठ्ठल काटे यांनी म्हटले आहे. आमचे कार्यकर्ते देखील तयारीला लागले आहेत, असं त्यांनी स्पष्ट केलं.
काटे यांनी निवडणूक लढवण्याची इच्छाच बोलून दाखवल्याने ही निवडणूक अधिक रंगतदार होण्याची शक्यता वर्तवली जात आहे. तसेच आता भाजप आणि राष्ट्रवादी काय निर्णय घेणार याकडेही सर्वांचं लक्ष लागलं आहे. दिवंगत लक्ष्मण जगताप यांचे स्थानिक राजकारणात सर्वपक्षीयांशी चांगले संबंध होते.आता जगताप यांचे निधन झाल्याने समर्थ पर्याय म्हणून काटे यांच्याशिवाय भाऊसाहेब भोईर, राहुल कलाटे, मोरेश्वर भोंडवे अशी तगडी नावे स्पर्धेत आल्याने रंगत वाढत चालली आहे.
