दि.०२ (पीसीबी)- मध्यपूर्वेत सुरू असलेल्या अमेरिका-इस्रायल आणि इराण संघर्षावर चीनने तीव्र प्रतिक्रिया देत तात्काळ युद्धविरामाची मागणी केली आहे. चीनच्या परराष्ट्र मंत्रालयाच्या प्रवक्त्या माओ निंग यांनी स्पष्ट इशारा दिला की, हा संघर्ष थांबवला नाही तर तो शेजारील देशांमध्येही पसरण्याचा धोका आहे. त्यामुळे सर्वात तातडीची गरज म्हणजे लष्करी कारवाया थांबवून संवाद आणि चर्चेद्वारे तोडगा काढणे, असे चीनने ठामपणे सांगितले.
अमेरिकेच्या हल्ल्यात इराणचे सर्वोच्च नेते आयातुल्ला अली खामेनेई ठार झाल्यानंतर परिस्थिती अधिकच तणावपूर्ण झाली आहे. या हल्ल्यात तेहरानमध्ये एका चिनी नागरिकाचाही मृत्यू झाल्याची पुष्टी चीनने केली असून संबंधित कुटुंबाला मदत पुरवली जात असल्याचे सांगण्यात आले आहे.
चीनने आपल्या नागरिकांना तातडीने इराण सोडण्याचा सल्ला दिला असून अझरबैजान, आर्मेनिया, तुर्की आणि इराकमार्गे स्थलमार्ग खुले असल्याची माहिती दिली आहे. आतापर्यंत ३ हजारांहून अधिक चिनी नागरिकांनी इराण सोडले आहेत. इस्रायलमध्ये राहणाऱ्या नागरिकांनाही सुरक्षित ठिकाणी हलण्याचा किंवा इजिप्तमध्ये जाण्याचा सल्ला देण्यात आला आहे.
बीजिंगने अमेरिकेच्या नेतृत्वाखालील हल्ल्यांचा निषेध करत हे आंतरराष्ट्रीय कायद्याचे उल्लंघन असल्याचा आरोप केला आहे. तसेच हे हल्ले संयुक्त राष्ट्र सुरक्षा परिषदेची परवानगी न घेता करण्यात आल्याचे चीनचे म्हणणे आहे. संघर्षाचा परिणाम शेजारील देशांवर होत असल्याबद्दलही चीनने गंभीर चिंता व्यक्त केली आहे.
दरम्यान, वाढत्या तणावामुळे मध्यपूर्वेतील विमानसेवा विस्कळीत झाली असून अनेक प्रवासी अडकले आहेत. तरीही परिस्थिती तणावपूर्ण असली तरी अमेरिका आणि चीन यांच्यातील संवाद सुरू असल्याचे स्पष्ट करण्यात आले आहे. अमेरिकेचे अध्यक्ष डोनाल्ड ट्रम्प यांच्या प्रस्तावित चीन दौऱ्यापूर्वी दोन्ही देश संपर्कात असल्याचे चीनने सांगितले आहे.एकूणच, जागतिक शक्तींच्या या संघर्षामुळे आंतरराष्ट्रीय पातळीवर तणाव वाढत असून जगाचे लक्ष आता पुढील राजनैतिक घडामोडींवर लागले आहे.
