दि.१३(पीसीबी)-इस्रायलने गाझामध्ये ‘व्हॅक्यूम बॉम्ब’ वापरले का? या संदर्भात एक अहवाल समोर आला असून त्यात असा दावा करण्यात आला आहे की गाझा संघर्षादरम्यान इस्रायलने विशेषतः दाट लोकवस्तीच्या भागांवर थर्मोबारिक शस्त्रांचा वापर केला. The Rest of the Story या शीर्षकाच्या अहवालानुसार, हे बॉम्ब हवेत इंधनासारखा ढग पसरवून नंतर स्फोट घडवतात, ज्यामुळे प्रचंड अग्निगोळा तयार होतो आणि आजूबाजूची हवा खेचली जाऊन ‘व्हॅक्यूम इफेक्ट’ निर्माण होतो. या स्फोटामुळे तापमान सुमारे ३५०० अंश सेल्सिअसपर्यंत पोहोचू शकते, असे म्हटले आहे.
अहवालात Mk-84 ‘हॅमर’ (९०० किलो वजनाचा बॉम्ब), BLU-109 ‘बंकर बस्टर’ आणि GBU-39 या शस्त्रांचा उल्लेख करण्यात आला आहे. अल-टाबिन शाळेवरील हल्ल्यानंतर या शस्त्रांचे तुकडे सापडल्याचा दावा करण्यात आला आहे. या प्रकारच्या शस्त्रांना एरोसोल बॉम्ब असेही म्हटले जाते.
अहवालानुसार, या बॉम्बमध्ये अॅल्युमिनियम आणि मॅग्नेशियमसारखे घटक असतात, जे मानवी शरीर काही सेकंदांत जाळू शकतात. या थर्मल म्युनिशन्सचा परिणाम इतका तीव्र असतो की इमारती बाहेरून सुरक्षित दिसल्या तरी आतमधील सर्व काही राख होते.
गाझाच्या सिव्हिल डिफेन्स टीमने सांगितले की जवळपास २,८४२ पॅलेस्टिनी नागरिक असे आहेत ज्यांच्या मृतदेहांचा कोणताही भाग सापडलेला नाही, तर ३,५०० हून अधिक जण अद्याप बेपत्ता आहेत.औपचारिक युद्धविराम दुसऱ्या टप्प्यात असतानाही हिंसाचार सुरूच असल्याचे वृत्त आहे. १० ऑक्टोबर २०२५ पासून ५०० हून अधिक पॅलेस्टिनी नागरिकांचा मृत्यू झाल्याचे सांगितले जाते. एकूण मृतांचा आकडा ७२,००० पेक्षा अधिक झाल्याचा दावा करण्यात आला आहे.
मानवाधिकार संघटनांनी इस्रायलवर युद्धगुन्ह्यांचे आरोप केले असून तज्ज्ञांच्या मते दाट लोकवस्तीच्या भागांत अशा शस्त्रांचा वापर हा अत्यंत गंभीर मुद्दा आहे.या आरोपांच्या पार्श्वभूमीवर इस्रायलचे पंतप्रधान बेंजामिन नेतन्याहू यांनी अमेरिकेचे माजी राष्ट्राध्यक्ष डोनाल्ड ट्रम्प यांची व्हाईट हाऊसमध्ये सुमारे दोन तास बंद दरवाज्यात बैठक घेतली. ट्रम्प यांनी नंतर सोशल मीडिया वर पोस्ट करत सांगितले की त्यांनी नेतन्याहूंना स्पष्ट केले की अमेरिका इराणसोबत अणुकराराबाबत चर्चा सुरू ठेवणार आहे.
बैठक अतिशय सकारात्मक झाल्याचे ट्रम्प यांनी सांगितले, मात्र कोणताही अंतिम निर्णय झालेला नाही असेही त्यांनी नमूद केले. गाझातील परिस्थिती आणि प्रादेशिक शांतता प्रयत्नांवरही चर्चा झाल्याची माहिती देण्यात आली. नेतन्याहू यांनी ट्रम्प यांची भेट घेण्यापूर्वी अमेरिकेचे परराष्ट्र मंत्री मार्को रुबिओ यांचीही भेट घेतली.
