आजोबांनी दोन कवितासंग्रहांचे स्वप्न फुलवले!
दि. २५ (पीसीबी) : “ज्याच्या डोळ्यांत स्वप्नांची पहाट दिसते, त्याच्यासाठी कविता ही आरती होते…”
अशा शब्दांत पुणे पिंपरी चिंचवड शहरातील रावेत नगरीत भोंडवे बाग समोरील भालचंद्र प्रॉस्पेरा सोसायटीत एक वेगळा सोहळा संपन्न झाला—वाढदिवसाचा, कवितेचा आणि नातवावरल्या प्रेमाचा!
संत साहित्याचे अभ्यासक, काव्य आणि अध्यात्माच्या वाटेवर निःस्पृहतेने पावले टाकणारे ह.भ.प. प्रा. रामकृष्णा महाराज पाटील यांनी त्यांच्या लाडक्या नातवाचे—चिरंजीव गर्ग चेतन पाटील—वाढदिवस खास पद्धतीने साजरा केला. गोड केकच्या ऐवजी शब्दांची फुले ओवली… आणि “मोहोर” व “प्रीत जागते हृदयी” हे दोन स्वलिखित काव्यसंग्रह त्यांच्या हातून विमोचित झाले!
काव्यगंध प्रकाशन, अहिल्यादेवीनगर यांच्या सौजन्याने प्रकाशित झालेले हे संग्रह म्हणजे आजोबांच्या हृदयातील भावना आणि नातवाच्या हसण्यातून स्फुरलेले गीत. एका साध्या वाढदिवसाला त्यांनी साहित्यिक झळाळी दिली, आणि उपस्थित प्रत्येकाच्या डोळ्यांत शब्दांचे अश्रू उभे राहिले.
प्रकाशन समारंभात भावपूर्ण वातावरण निर्माण झाले होते.
दीपक पाटील यांच्या प्रास्ताविकाने कार्यक्रमास सुरुवात झाली.
चेतन पाटील यांनी कृतज्ञतेच्या सुरांत आभार मानले.
कार्यक्रमाच्या वेळी अशोक ढाणे, निर्मल चौधरी, वैभव ढाणे, सागर भारंबे, मयूर रेवतकर, कृतिका रेवतकर, नीलम ढाणे, वैशाली पाटील, सुचिता पाटील, वृषाली चौधरी, प्राजक्ता भारंबे आणि सुरेखा पाटील यांची उपस्थिती ही घरगुती स्नेहाचे प्रतिबिंब होती.
प्रेम फक्त दिले जात नाही, ते उमलवले जाते… आणि कवितेच्या निमित्ताने ते अक्षरशः अमर होत जाते!
आजोबांच्या या आगळ्या उपक्रमामुळे एका वाढदिवसाचे रूपांतर स्मरणीय साहित्यसोहळ्यात झाले… शब्दांची मोहोर नातवाच्या बालहसण्यात उमलली… आणि प्रीत जागून राहिली—हृदयात!
