दि . २६ ( पीसीबी ) – पुणे आणि पिंपरी-चिंचवडमधील नागरिकांसाठी एक आनंदाची बातमी आहे. पुणे विद्यापीठ चौकात उभारला जात असलेला महत्त्वाकांक्षी डबल डेकर उड्डाणपूल (Double Decker Flyover) येत्या जून महिन्यात नागरिकांच्या सेवेत दाखल होणार आहे. पुणे महानगर प्रदेश विकास प्राधिकरण (PMRDA) या प्रकल्पाची अंमलबजावणी करत आहे.
पुणे शहरात वाढत्या वाहतूक कोंडीमुळे नागरिक त्रस्त :
सध्या पुणे शहरात वाढत्या वाहतूक कोंडीमुळे नागरिक त्रस्त झाले आहेत. वेळेचा अपव्यय, इंधनाची नासाडी आणि वाढते प्रदूषण ही मोठी समस्या बनली आहे. या समस्यांवर उपाय म्हणून PMRDA विविध पायाभूत सुविधा प्रकल्प राबवत असून, या उड्डाणपुलामुळे वाहनचालकांना मोठा दिलासा मिळणार आहे.
विद्यापीठ चौकात उभारला जाणारा डबल डेकर उड्डाणपूल शिवाजीनगर, औंध, बाणेर, पाषाण, हिंजवडी आणि गणेशखिंड रस्ता या महत्त्वाच्या मार्गांना जोडणारा असेल. या पुलामुळे परिसरातील वाहतूक अधिक सुलभ होणार आहे. दररोज या मार्गावरून प्रवास करणाऱ्या हजारो प्रवाशांना मोठा फायदा होणार आहे.
सध्या पुलाला स्टील गर्डर बसवण्याचे काम अंतिम टप्प्यात आहे. पुलासाठी 32 आधारस्तंभांचे काम पूर्ण झाले असून, गर्डर लांबी 55 मीटर आणि रुंदी 18 ते 20 मीटर इतकी आहे. औंध व शिवाजीनगरकडे जाणारे काही रॅम्प 20 मेपासूनच कार्यान्वित झाले आहेत. उर्वरित कामे जून अखेरपर्यंत पूर्ण होणार आहेत.
हा दुमजली पुल वाहतूक सुरळीत करण्यास मदत करणार आहे. प्रवासाचा वेळ लक्षणीय घटणार असून, इंधनाचीही बचत होणार आहे. परिणामी शहरातील प्रदूषणातही घट होण्याची शक्यता आहे. त्यामुळे पर्यावरणीयदृष्ट्या हाही प्रकल्प फायदे
शीर ठरणार आहे.
जून 2025 मध्ये हा डबल डेकर फ्लायओव्हर नागरिकांसाठी खुला होत असल्याने, पुणेकरांसाठी ही बातमी नक्कीच दिलासादायक आहे. शहरातील वाहतूक व्यवस्थेला चालना देणारा आणि नागरी जीवनमान उंचावणारा हा महत्त्वपूर्ण टप्पा असेल.
