पिंपरी, दि. १६ (पीसीबी) – पिंपरी-चिंचवड शहरातील कचऱ्याचा प्रश्न गंभीर होत चालला असताना आणि मोशी कचरा डेपोची जागा अपुरी ठरत असतानाच महापालिका प्रशासनाने शहरालगतच्या देहूरोड आणि खडकी कॅन्टोन्मेंट बोर्ड हद्दीतील कचराही मोशीतील कचरा डेपोत टाकण्यास परवानगी दिली. या दोन बोर्डाचा कचरा टाकण्यास सुरूवात झाली असून आता प्रतिदिन मोशीत 30 टन कचऱ्याचा भार वाढला आहे.
पिंपरी-चिंचवड शहरातील कचरा सातत्याने वाढत असून सध्या प्रतिदिन 1200 टन कचरा निर्माण होत आहे. त्यामुळे मोशीतील कचरा डेपोची क्षमता संपू लागली आहे.
देहूरोड कॅन्टोन्मेंट बोर्ड हद्दीतून गोळा केला जाणारा कचरा निगडी सेक्‍टर 22 येथील मोकळ्या मैदानात आणि आणि खडकी कॅन्टोन्मेंट बोर्ड हद्दीतून गोळा केला जाणारा कचरा संत तुकारामनगर येथील लष्कराच्या मोकळ्या जागेत टाकला जात होता. विनाप्रक्रीया टाकल्या जाणाऱ्या या कचऱ्यास वारंवार आग लागण्याच्या घटना घडत होत्या. तसेच कचऱ्याची दुर्गंधी आणि धुर यामुळे परिसरातील नागरिकांच्या आरोग्याचा गंभीर प्रश्न निर्माण झाला होता. परिसरातील नागरिकांना अस्थमा, दमा यासारखे श्वसनाचे विकार होत असल्याच्या तक्रारी लोकप्रतिनिधी आणि सामाजिक संस्थांनी वेळोवेळी महापालिका प्रशासनाकडे केली होती.
या गंभीर प्रश्नाबाबत महापालिका आयुक्त आणि देहूरोड कॅन्टोन्मेंट बोर्डाचे मुख्याधिकारी यांची 2 जून 2022 रोजी बैठक पार पडली. या बैठकीत तात्पुरती उपाययोजना म्हणून देहूरोडमधील 17 ते 18 टन व खडकी कॅन्टोन्मेंट बोर्ड हद्दीतील 10 ते 12 असा प्रति दिन गोळा होणारा अंदाजे 30 मेट्रीक टन कचरा पुढील पर्यायी व्यवस्था होईपर्यंत मोशी कचरा डेपोत स्विकारण्याची विनंती दोन्ही कॅन्टोन्मेंट बोर्डानी महापालिकेकडे केली.
देहूरोड व खडकी कॅन्टोन्मेंट बोर्ड हद्दीतील कचऱ्याची शास्त्रोक्त पद्धतीने विल्हेवाट लावण्याची यंत्रणा त्यांच्याकडे उपलब्ध नाही. हा कचरा पिंपरी-चिंचवड शहरात व लगत टाकला जात असल्याने त्याची पर्यायी व्यवस्था होईपर्यंत देहूरोड व खडकी कॅन्टोन्मेंट बोर्डाच्यावतीने त्यांचा गोळा होणारा सुका कचरा स्वखर्चाने वाहतूक करून मोशीतील कचरा डेपोत सव्वा महिन्यांपासून आणला जात आहे. या कचऱ्यावर प्रक्रीया करण्यासाठी महापालिकेस येणाऱ्या खर्चाच्या प्रमाणात प्रतिटन 504 रूपये शुल्क दोन्ही कॅन्टोन्मेंट बोर्ड महापालिकेला देणार आहे.
देहूरोड व खडकी कॅन्टोन्मेंट बोर्ड हद्दीतील कचऱ्याची शास्त्रोक्त पद्धतीने विल्हेवाट लावण्याची यंत्रणा त्यांच्याकडे उपलब्ध नाही. यंत्रणा उपलब्ध नसल्याने शासनाच्या आदेशाप्रमाणे दोन्ही बोर्ड परिसरातील सुमारे 30 टन सुका कचरा मोशीतील कचरा डेपोत टाकण्यास सुरूवात केली असल्याचे पर्यावरण विभागाचे सह शहर अभियंता संजय कुलकर्णी यांनी सांगितले.
