दि.२८(पीसीबी)-सप्टेंबर हा दिवस सर्वत्र जागतिक रेबीज दिन म्हणून साजरा करण्यात येतो. या दिनाचे औचित्य साधून ‘पशुवैद्यकीय विभाग, पिंपरी चिंचवड महानगरपालिका’ व ‘मिशन रेबीज’ यांचे संयुक्त विद्यमाने महानगरपालिका हद्दीत २६ सप्टेंबर २०२५ ते ३ ऑक्टोबर २०२५ या कालावधीत रेबीज लसीकरण सप्ताह साजरा करण्यात येत आहे. या निमिताने आज महानगरपालिकेमार्फत पाळीव श्वानांना पशुवैद्यकीय दवाखाना (नेहरूनगर व निगडी प्राधिकरण) येथे तसेच भटक्या श्वानांना श्वान पथकामार्फत मोफत लसीकरण करण्यात आले. श्वानपालकांनी व प्राणीप्रेमींनी आपल्या श्वानांचे लसीकरण करुन घेतले.
या निमिताने पिंपरी चिंचवड महानगरपालिकेचे आयुक्त शेखर सिंह यांचे मार्गदर्शनाखाली पशुवैद्यकीय विभागामार्फत लसीकरण कार्यक्रम राबविण्यात आला. सदर कार्यक्रमास अतिरिक्त आयुक्त विजयकुमार खोराटे यांनी नेहरूनगर येथील पशुवैद्यकीय दवाखान्यात उपस्थित राहून पशुपालक व पशुप्रेमी तसेच कर्मचारी यांना मार्गदर्शन केले. उपआयुक्त संदीप खोत यांनी कार्यक्रमाबद्दल तसेच विभागातील विविध उपक्रमाबद्दल माहिती दिली. कार्यक्रमास मुख्य पशुसंवर्धन अधिकारी डॉ. अरुण दगडे, पशुधन विकास अधिकारी डॉ. स्वप्नील शिंदे, श्री. जयदीप पुरोहित (CTO), श्री. रौनक (MISSION RABIES) व विभागाचे सर्व अधिकारी / कर्मचारी उपस्थित होते. महानगरपालिका व MISSION RABIES यांचे संयुक्त विद्यमाने रेबीज या रोगाबद्दल जनजागृती व रेबीज संसर्गजन्य रोगाचे मुळापासून निर्मुलन करणेकरिता जागतिक रेबीज दिनाच्या निमित्ताने पशुवैद्यकीय विभागामार्फत लसीकरण व जनजागृती मोहिम राबविण्यात आली.
शहरातील विविध ठिकाणी प्रक्षेत्रावर ४ पशुवैद्यकीय पथके व MISSION RABIES पथक तैनात करून भटक्या व बेवारस श्वानांचे लसीकरण करण्यात आले. लसीकरण करताना शहरातील विविध प्राणी प्रेमींद्वारे सहकार्य करण्यात आले.
पशुवैद्यकीय पथक :-
१) पशुवैद्यकीय अधिकारी – १
२) पशुधन पर्यवेक्षक – १
३) डॉग क्याचर – ३
४) आरोग्य निरीक्षक – १
लसीकरण करण्यात आलेले ठिकाण :-
१) रावेत परिसर
२) चिंचवडगाव परिसर
३) मोशी परिसर
४) भोसरी / दिघी परिसर
