दि.३०(पीसीबी)-उत्तरकाशी जिल्ह्यातील भागीरथी नदीवरील जोशियारा बॅरेजमध्ये रविवारी राष्ट्रीय आपत्ती प्रतिसाद दल (NDRF) आणि राज्य आपत्ती प्रतिसाद दलाच्या (SDRF) पथकांनी एका स्थानिक पत्रकाराचा मृतदेह शोधून काढला. मृत व्यक्तीची ओळख राजीव प्रताप (वय ३६) अशी करण्यात आली असून, ते ‘दिल्ली उत्तराखंड लाईव्ह’ नावाचा युट्यूब चॅनल चालवत होते. राजीव प्रताप १८ सप्टेंबरपासून बेपत्ता होते.
त्यांच्या काका कृपाल सिंग यांनी २० सप्टेंबर रोजी उत्तरकाशी पोलिस ठाण्यात भारतीय न्याय संहितेच्या कलम १४०(३) (कोणत्याही व्यक्तीस गुप्तपणे व बेकायदेशीररीत्या डांबून ठेवण्याच्या उद्देशाने अपहरण किंवा बंदी घालणे) अंतर्गत FIR दाखल केली होती.
कृपाल सिंग यांनी तक्रारीत म्हटले की, प्रताप एक निर्भय पत्रकार होते आणि त्यांनी अनेक ठिकाणी स्थानिक प्रश्नांवर आवाज उठवला होता, त्यामुळे अनेकांचे ते विरोधक बनले होते. त्यांनी असेही सांगितले की, उत्तरकाशी रुग्णालयातील हलाखीच्या परिस्थितीवर केलेले एक व्हिडिओ हटवण्याचा दबाव प्रताप यांच्यावर आणला जात होता, आणि ते बेपत्ता होण्याच्या दिवशी गंगोरीकडे जाण्याचे कोणतेही कारण नव्हते.
सिंग यांनी सांगितले की, १८ सप्टेंबर रोजी प्रताप यांनी सोबन सिंग यांच्या मालकीची अल्टो कार घेऊन गंगोरीकडे जाण्यास सुरुवात केली होती. १९ सप्टेंबर रोजी ही कार गंगोरीजवळ भागीरथी नदीत सापडली.
SDRF कमांडंट अर्पण यादवंशी यांनी सांगितले की, १९ सप्टेंबर रोजी जिल्हा नियंत्रण कक्षाला नदीत एक वाहन बुडाल्याची आणि त्यात एखादा चालक असण्याची माहिती मिळाली होती. त्यानंतर तातडीने बचावकार्य सुरू करण्यात आले, परंतु त्यावेळी प्रताप यांचा काही थांगपत्ता लागला नाही.
“पथकाने अनेक दिवस नदी आणि आसपासच्या परिसरात जोरदार शोध मोहीम सुरू ठेवली होती. रविवारी, जोशियारा बॅरेजमध्ये मृतदेह आढळून आला, आणि तो जिल्हा पोलिसांच्या ताब्यात देण्यात आला,” असे यादवंशी यांनी सांगितले.
उत्तरकाशीचे पोलीस अधीक्षक सरिता डोभाल यांनी सांगितले की, मृतदेहावर कोणतेही दृश्यमान जखमेचे निशाण दिसले नाहीत. पोस्टमार्टमसाठी मृतदेह पाठवण्यात आला असून, त्यानंतर अहवालाच्या आधारे पुढील कारवाई करण्यात येणार आहे, असेही त्यांनी नमूद केले.
