दि.१६(पीसीबी)-हैदराबादच्या मोईनाबादमधील एका आलिशान फार्महाऊसवर सुरू असलेल्या पार्टीवर पोलिसांनी अचानक छापा टाकत मोठी कारवाई केली असून या प्रकरणात एकूण ११ जणांना ताब्यात घेण्यात आले आहे, ज्यामध्ये टीडीपीचे खासदार पुट्टा महेश कुमार आणि बीआरएसचे माजी आमदार पायलट रोहित रेड्डी यांचा समावेश आहे. शनिवारी रात्री EAGLE फोर्स आणि स्थानिक पोलिसांनी गोपनीय माहितीच्या आधारे रोहित रेड्डी यांच्या मालकीच्या फार्महाऊसवर धाड टाकली, जिथे मद्यपानासोबतच अमली पदार्थांचा वापर झाल्याचा संशय व्यक्त करण्यात आला.
प्राथमिक तपासात पाच जण ड्रग्स सेवन करत असल्याचे आढळले, तर महेश कुमार यांचा सुरुवातीचा अहवाल निगेटिव्ह असला तरी पुढील रक्त तपासणीत ते पॉझिटिव्ह आढळले. कारवाईदरम्यान एका व्यावसायिकाने रिव्हॉल्व्हरमधून हवेत तीन गोळ्या झाडल्याचा आणि पोलिसांच्या दिशेने एक गोळी झाडल्याचा गंभीर आरोप असून घटनास्थळावरून .32 कॅलिबरचा रिव्हॉल्व्हर, जिवंत व रिकामे काडतुसे, ०.२६ ग्रॅम कोकेन आणि मोठा मद्यसाठा जप्त करण्यात आला आहे. या प्रकरणी एनडीपीएस कायदा, शस्त्र कायदा, तेलंगणा उत्पादन शुल्क कायदा आणि भारतीय न्याय संहिता अंतर्गत गुन्हा दाखल करण्यात आला असून रोहित रेड्डी आणि गोळीबार करणाऱ्या व्यक्तीसह तिघांना ताब्यात घेण्यात आले आहे, तर खासदार महेश कुमार आणि इतर सात जणांना नोटीस देऊन जामिनावर सोडण्यात आले आहे.
तपासादरम्यान काहींनी फार्महाऊसवरच तर काहींनी गोव्यात यापूर्वी ड्रग्स सेवन केल्याचे कबूल केले असून जप्त केलेले पदार्थ फॉरेन्सिक तपासणीसाठी पाठवण्यात आले आहेत आणि त्यांच्या स्रोताचा शोध घेण्यासाठी पुढील तपास सुरू आहे. विशेष म्हणजे, २०२२ मधील आमदार खरेदी प्रकरणामुळे चर्चेत आलेले रोहित रेड्डी पुन्हा एकदा वादाच्या भोवऱ्यात सापडले आहेत.
